
Dili, Radio Online, “Se hau mak iha Mauk Moruk nia fatin, defende objetivu ida, hau lakohi subar an, mai ita koalia politika, justisa, duke hau subar para ema koalia oin-oin”, lia hirak ne’e hato’o husi Maijor Jeneral Lere Anan Timur, iha Palasio Presidente, Aitarak laran.
Nia esplika katak hahalok ne’ebe Mauk Moruk hatudu ne’e komportamentu ida ne’ebe ladun agradavel ba komunidade, halo populasaun senti tauk.
“ita nia nasaun ne’e ita harii ho ran no isin, ita hakarak ita nia povu, ita nia juventude no ita nia oan sira ne’e hakmatek, hare ba sira nia futuru” dehan Maijen Lere, iha loron Kuarta feira 21/01/2015.
Nia akresenta liu tan liliu iha suku Saelari, Munisipiu Baucau populasaun barak mak abandona sira nia uma, no iha capital Dili populasaun barak mak paniku, tan ne’e Mauk Moruk presija hanoin ida ne’e, se iha problema tur hamutuk hodi resolve, nudar ema intelektual no polítiku tenki manten pozisaun atu koalia”.
Relasi ona ho polisia ne’ebe hetan kanek iha suku saelari nia hateten ne’e laos Mauk Moruk mak fo autorizasaun maibe deskontrola, “ hau la fiar katak mauk Moruk mak halo autorizasaun maibe tamba ema barak demais balun emosaun no frutasaun, deskontrola, ikus mai resulta polisia kanek”.
Nia informa liu tan oras ne’e dadaun Forsa Defeza Timor-Leste, Kontinua fo apoiu ba Polisia Nasional Timor Leste (PNTL), hodi halo atuasaun iha Musipiu Baucau.
