Angela Freitas Laiha Relasaun Ho Mauk Moruk, Krimi Hatan Iha Justisa

Dili, Radio Online, Hatan ba informasaun husi Presidenti Partidu Trabalista Angela Freitas iha loron 21/1/15 iha konferensia da imprensa katak nia hetan kontaktu husi Mauk Moruk, katak Mauk Moruk sei intrega an liu husi mediasaun Embaixada Amerika no Embaixada Australia tamba konsidera Embaixada rua ne’e mak independente liu duke Governantes Timor Leste, Maijor Jeneral Falintil Forsa Defeza Timor-Leste (FFDTL)  Lere Anan Timur, iha Kinta-Feira(22/1/2015) iha Kuarte Jeral FFDTL Fatuha hatan Angela Freitas labele hatama kanuru tohar iha grupu CRM.

Maijor Jeneral Falintil Forsa Defeza Timor-Leste (FFDTL) Lere Anan Timur hateten liutan katak “hau hanoin Angela Freitas bingga hau, hau dehan nia beik, tamba uluk iha krize 2006, nia bolu hau atu ba halo golpe, maibe hau lakoi, agora nia involve tan ona ho hau nia maun alin Mauk nia problema, nia laiha asuntu ida ho Mauk”.

Lere esplika  tan konaba pedidu husi Anjela Freitas, Mauk Moruk hakarak intrega an maibe mediasaun liu husi Embaixada Amerika no Australia katak “situasaun dadaun lahanesan ho situasaun uluk, tamba agora ne’e krime, krime so justisa deit mak foti desizaun, laos Embaixada Amerika, laos Embaixada Australia, laos governu, maibe tribunal mak tesi, tamba tribunal orgaun independente, se se deit mak halo krime tenke intrega ba tribunal”, tenik Lere.