PR Taur Apresia Ba Progresu F-FDTL

Dili Radio Online, Prezidente da Republika (PR), Taur Matan Ruak iha loron 22/01/2015 hala’o vizita ba kuartel Jeral Falintil, Forsa Defeza Timor Leste (F-FDTL), hodi haree direta situasasun forsa nian.

“Primeira vez, aproveita tempu hau mai vizita Forsa, liu-liu hodi hatene sira nia situasaun, no dezenvolvimentu no inteira buat ne’ebe sira hala’o iha ne’e” Hateten Taur iha kuartel Geral Fatuhada, Dili.

Tuir nia, ohin loron, iha avansu ne’ebe pozitivu tebes, tamba sira halo esforsu maka’as liu husi investimentu iha area rekursus umanus, infreastruturas no mos logistika, maske sei enfrenta hela problemas balun.

“Kompara ho hau nia tempu kuandu hau sei iha ne’e, ohin loron la’o maka’as los, faktu ida mak uluk hau sei iha ne’e, uma ida ne’e seidauk iha, ohin sira iha uma bo’ot para bele halo serbisu , ne’e balansu ida pozitivu iha area Dezenvolvimentu F-FDTL ninian”, Esplika Taur.

Iha vizita Xefe Estadu ne’e simu direta husi Maijor General Lere Anan Timur, ho onra parada militar hafoin tama ba sala laran hodi hala’o enkontru jeral ho superior forsa defeza nian.

Iha fatin hanesan, Maijor General Lere Anan Timur hato’o katak, vizita Xefe Estadu nian hanesan loron ne’ebe espesial tebes ba sira tamba maske Xefe Estadu preukupa ho serbisu vijita Sukus sira iha territoriu Timor laran tomak, maibe bele fahe mos tempu hodi hala’o vizita ba sira.

Iha biban ne’e Lere Anan Timur husu ba ninia membrus sira atu labele apresia de’it ho susesu ne’ebe sira atinji ona, maibe tenke esforsu aan maka’as atu halo di’ak liu tan. 

“Ita nia Prezidente nu’udar komandante supremu Forsas Armadas fo loubor ba ita, maibe loubor la signifika katak, ita atu kontente, haksolok de’it, maibe, ita mos tenke medita katak, buat ne’ebe ita halo diak, ita tenke halo diak liu tan”, haktuir Lere Anan Timur.

Antes atu remata ninia deskursu Lere mos fo agradese ba Prezidente da Repúblika tamba alem de preukupa hala’o vizita ba populasaun sira husi Suku ba Suku no bele preukupa mos ba Forsas Armadas sira.

No tuir nia, nasaun atu iha hakmatek nia laran, wainhira forsa defeza F-FDTL ho PNTL tenke hakmatek no importante maka mantein disiplina iha instituisaun. 

“Hau ko’alia bei-beik ba forsa armadas no komandante sira katak, enkuantu forsas armadas F-FDTL ho PNTL hakmatek ita nia nasaun mos hakmatek tamba ne’e maka disiplina ne’e importante ba ita nia instituisaun”, dehan Maijor Jeneral.