Passa Revista Kareta Membru Parlamentu Signifika Iha Deskonfiansa.

Dili, Radio Online, Polisia Nasional Timor-leste (PNTL) Halo passa revista ba Kareta membru parlamentu nia, ne’e konsidera hanesan deskonfiansa ida ba membru Parlamentu sira, Kestiona  Deputadu Virgilho Ornai, iha plenaria segunda_feira 26/1/2015 Iha Parlamentu Nasional.

Virgilho Ornai lamenta katak “ laos tamba halo Check Point ba nia kareta maibe hanesan ema Autoridade estadu nia sente ladun diak no hamosu deskontente wainhira parte seguransa tau passa revista ba kareta membru Parlamentu nia, konsidera katak iha buat ruma ou iha deskonfia ruma” dehan Vigilho.

Virgilho dehan tan ‘ ne’e laos atu fo sala ba Polisia, tamba ne’e sira nia knaar, maibe kuandu hanesan ne’e, signifika autoridade seguransa iha deskonfiansa ba membru parlamentu”.

“sekarik parte seguransa sente iha deskonfiansa ba membru parlamentu ruma, tau intelijensia hodi identifika lolos ema ne’e, para tau atensaun ou halo akompanhamentu ba nia”, tenik Vigilho. 

Hatan ba ne’e, Adjuntu Komandante Jeral PNTL Komisariu Afonso De Jesus hateten “se ita hotu hakarak kontribui ba Estabilidade ba rai ida ne’e, ita hotu tenke kumpri servisu seguransa nian, ne’e obrigasaun seguranasa nian”.

“ Lei mak as liu ema hotu-hotu, ita hotu tenke kumpri lei seguransa, tenke kumpri ba regras, Polisia  halo Check point laos deit ba sosiedade sivil, laos atu hare ba sese deit  maibe ba sidadaun hotu-hotu,  Check point laos atu impede total ema nia movimentu, maibe atu assegura deit estabilidade” dehan Afonso.