
Dili, Radio Online, Situasaun Timor-leste em jeral dadaun ne’e lao hakmatek, hateten Adjuntu Komandante Jeral Polisia Nasional Timor-leste (PNTL) Komisariu Afonso de Jesus ba Jornalista Radio Liberdade iha nia knaar fatin Kuartel Jeral PNTL Kaikoli Dili 28/1/2015.
Adjunto Komandante Jeral Polisia Nasional Timor-leste (PNTL), Komisariu Afonso de Jesus informa katak situasaun seguransa Timor-leste liu-liu iha Baukau inklui mos iha Kapital Dili oras ne’e lao kontroladu no hakmatek.
“Maske situasaun iha Baukau halo ema hotu sente Paniku no tauk, maibe oras ne’e hakmatek fila fali, tamba husi parte seguransa PNTL fo apoiu masimu ba iha areas ne’eba, ”Dehan Afonso.
Afonso hateten tan situasaun iha Baukau laiha influensia ba seguransa iha Munisipiu seluk, maibe situasaun ne’e afeita liu ba komunidade sira, tamba ne’e komandu PNTL nafatin fo orientasaun ba membru sira atu mantein pozisaun no prontu fo apoiu ba komunidade sira.
“Komandu husu mos ba komunidade atu fo kontribuisaun ba seguransa iha rai laran, no fo apoiu ba servisu seguransa iha ita nia rai, liu husi kontribuisaun sira ne’e mak situasaun em jeral bele lao ho diak, ” tenik Afonso.
Afonso dehan tan husi parte seguransa sei esforsu nafatin, no fo orientasaun nafatin hosi garante estabilidade ba komunidade sira iha rai laran.
