PM Indizitadu Hatama Proposta Ba PR

Dili, Radio Online, Primeiru Ministru (PM) indizitadu, Rui Maria Araujo,  Kuarta feira 11/02/2015/ hatama proposta konaba kompozisaun VI guvernu konstitusional ba Prezidente Republika (PR), Taur Matan Ruak, iha Palasiu Prezidente Aitarak-Laran, Dili.

PM Indizitadu deklara katak, guvernu  iha tempu badak sei halo konferensia da impresa konaba lista kompozisaun ba membru guvernu foun nian. 

Rui Araujo akresenta liu tan nia asume kna’ar nudar PM ba VI Guvernu Konstitusional nudar prevelijiu no onra bo’ot ida hodi konstrui nasaun ne’e ba oin, “Prevellijiu no honra bo’ot ida mai hau, hodi atu hamriik iha guvernu ida ne’e nia oin, guvernu ida ne’ebe reprezentate unidade Nasional, reprezenta konsensu politíku, oras ne’e dadaun iha ita nia país doben ida ne’e”.

Iha fatin hanesa Xefe Casa Civil, Fidelis Mangalaes, akresenta kona ba lista kompozisaun membru guvernu foun nian sei iha prosesu nia laran no Presidente da Republika sei halo publiksaun liu husi komunikadu da imprensa, “ita tenki fo tempu xefe estadu hodi hanoin, ita labele ansi, ida ne’e prosesu ida para hanoin didiak hodi nune’e ema ne’ebe mak hetan nomeasaun iha guvernu foun ne’e tenki serve duni hodi servi nasaun ida ne’e”.

Nia klarifika liu tan ba jornalista sira katak tomada de posse ba guvernu foun iha loron 13/02/2015 sei muda fali ba loron Segunda feira 16/02/2015, iha Palacio Nobre Lahane, tamba kestaun  lojistika no teknika.