Eventu Karnaval 2015, Grupo Ilimanu Sai Primeiru Lugar 

Dili, Radio Online, Relasiona loron domin ka Valentine day, nian ne’ebé monu iha loron 14 Fevereiru, iha tinan ne’e, iha loron 14/02/2015, Ministeriu Turizmu Comersiu no Industria MTCI indijitadu Françisco Kalbuady Lay realiza kompetisaun karnaval. 

Kompetisaun karnaval ba tinan ida ne’e 2015 hetan partisipasaun husi total 57 grupus ne’ebé mai husi Sosiedade Sivil, Embaixadas, Universitarius no mós Eskolas Sekundarias.

Manan na’in ba kompetisaun tinan ida ne’e maka primeiru lugar husi grupu Ilimanu ho valóres   Rihun ida sanulu resin lima (1015), segundu lugar  ho valór atus sia sia nulu resin lima (995) ne’ebé okupa husi grupu María Auxiliadora.

No Terseiru lugar, ho pontu atus sia walu nulu (980) Husi grupu Gembel Art Collection no mós ikus liu Grupu favóritu, ho valór atus sia hitu nulu (970) manan nain mak grupu Barosda.

Tuir koordenador husi partisipante Grupu Eskola Sekundariu 4 de Setembru UNAMET Díli, Laura Zélia Belo katak maske sira lakon iha kompetisaun refere, maibé sira sente kontente tebes tamba bele partisipa iha kompetisaun ne’e hamutuk ho kolegas sira, “Ba loron ohin maske ami lakon maibé ami la laran tirste, tamba bele hamutuk ho kolega sira kontente partisipa iha ne’e, ne’eduni ami la triste tamba la hetan juara”.

Nia hatutan tan katak ho rezultadu ne’ebé sira hetan hanesan esperensia ida atu nune’e sira bele prepara aan di’ak liu tan hodi kompete fali iha tinan oin mai, maibé, nia mós sujere ba parte kompetente atu habo’ot liu tan programa ne’e hodi bele hetan partisipasaun mós husi nivel Munisípiu sira hotu,  “Hau nia lia menon ba parte Guvernu, se bele karik iha tinan oin mai, bele habo’ot liu tan. Tamba iha parte Díli de’it mak partesipa, ne’ebé se bele karik iha tinan oin mai bele kovida mós sira husi Distritu mai konsentra hotu iha ne’e”Nia sujere.

Entretantu tuir Prezidente Komisaun Organizadora María Ernestina Lopes, programa refere hanesan programa anual ne’ebé kada tinan aloka orsamentu ho valor total cinquenta míl (50.000) Dollares Amerikanu,  “Orsamentu hanesan tinan-tinan aprova 50.000 ne’e hodi ajuda ba grupu partesipante sira hotu-hotu enklui mós ba komisaun organizadora”Nia esplika.

Iha fatin hanesan tuir reprezentante do juri Nicolay esplika katak kritéria ba selesaun manan na’in sira haree husi kreatividade, aprezentasaun no mós sira seluk tan ne’ebé partisipantes sira aprezenta. “Ami haree husi sira nia Kreatividade, no mós aprezentasaun”Nia hato’o.

Tuir nia partesipantes ne’ebé partisipa iha eventu tinan ida ne’e kapas hotu, maibé juri tenke deside ekipa ida maka di’ak liu hotu no mós sai hanesan vensidor, “Sira seluk ne’ebé la liu tamba haree ba sira nia kreatividade, unidade no sira seluk tan, sira hotu-hotu di’ak so ke valór husi juri ne’e sempre iha ida ke di’ak liu”.

Aktividade Karavana hahu husi Ministariu dos Negosius Estrangeirus no Kooperasaun (MNEK) nia oin no final aprezentasaun iha Palasiu do Guvernu.