PNTL Departamentu Saude Halo Destroisaun Aimoruk

Dili, Radio Online, Polisia Nasional Timor Leste PNTL, liu husi Departamentu Saude halo Destroisaun Aimoruk Kaisa haat ne’ebe prazu liu tiha ona, iha Kuarta-Feira  18/2/2015, iha Fatin Soe Llixu, Tibar.

Shefe Departamentu Klinika PNTL, Abilio de Araujo Gonsalves, hateten Aimoruk ne’ebe nia data expire liu ou Prazu liu ona tenke soe iha fatin ne’ebe dook atu nune’e labele fo sala ba Pasiente, “Aimoruk ne’ebe dadaun ami soe tamba prazu liu ona, Aimoruk ne’e rasik laos mai husi Ministeriu Saude, laos sosa husi ami nia departamentu, maibe Aimoruk ne’e Suporta husi UNPOL Malaisya momentu sira nia misaun remata”.

Abilio hateten tan  kategoria Aimoruk ne’ebe expire, “Aimoruk ne’ebe ami halo destroisaun hamutuk item 19, Aimoruk hirak ne’e, ke’e rai kuak no tau hamutuk, hodi sunu, atu nune’e animal ou ema, labele foti sala hodi afeita ba saude”.