Dili, Radio Online, Primeiru Ministru Rui Maria Araujo halo Vizita ba Kuartel Jeral Polisia Nasional Timor-Leste (PNTL), Kaikoli, Sesta-Feira, 20/2/2015.
Iha Vizita ne’e Primeiru Ministru Rui Maria Araujo halo enkontru badak ida ho komandante PNTL interinu no ofisiais sira hotu hodi halo aprezentasaun konaba situasaun PNTL actual, “hau agradese ba servisu sira ne’ebe mak durante ne’e PNTL halo ona, hanesan Polisiamentu Komunitaria no operasaun, hodi mantein Estabilidade iha area bar-barak”, dehan PM Rui.
PM Rui mos husu ba PNTL atu iha tinan tuir mai ou futuru mai fo importansia ou prioridade makaas liutan ba polisiamentu komunitaria no Polisia Tranzitu, “PNTL tenke fo prioridade ba Polisiamentu Komunitaria, atu nune’e, mantein estabilidade iha komunidade nia leet, fo prioridade mos ba Polisia Tranzitu, liliu iha sidade Dili ne’ebe sai mos hanesan, ponte potensial desordem, kontrola mos ba trafiku sira seluk no imigrasaun sira ne’ebe seidauk loos”, tenik PM Rui.
PM Rui husu mos ba Komando PNTL nian ho ofisiais Superior sira hotu atu mantein disiplina, no kaer metin liafuan rua rigoroju no firmeza, signifika katak halo lolos buat ne’ebe mak los, no sala dehan sala, loos dehan los, keta tauk atu husu deskulpa ba buat ne’ebe mak sala.
Iha fatin hanesan Adjuntu Komandante Jeral Komisariu Afonso De Jesus hateten sente kontente ho Vizita Primeiru Ministru Rui Maria, “PM fahe mos orientasaun konaba oinsa mak polisia ne’e bele kaer knaar ba iha futuru, e hau aprezenta mos estatistik Krimi ninian husi 2013 too agora, no konaba planu estratejia sira ne’ebe mak planea nanis tiha ona husi Eis Komandante Jeral Longinhos Monteiro”.
