Maske Populasaun Sei Trauma No Tauk Maibe Situasaun Munisipiu Baukau Hakmatek

Dili, Radio Online, Situasaun Baukau dadaun hakmatek maske populasaun sira sei trauma no tauk atu ba to’os no natar  tamba Mauk Moruk ho nia grupu seidauk ba hatan iha Tribunal, dehan Komandante Baukau Superintendente Justinho Menezes iha Sesta 20/2/2015 iha Kuartel Jeral PNTL, Kaikoli, Dili.

Komandante Baukau Superintendente Justinho Menezes hateten, “Asaun ne’ebe Polisia sira halo dadaun iha parte Suku Saelari Postu Administrativu Laga, Polisia Espesial sira hamutuk ho Forsa FFDTL sei mantein halo operasaun ba Komandante CRM Paulino Gama alias “Mauk Moruk” hodi garantia estabilidade”.

Justinho  mos hateten tan operasaun lao normal hanesan halo  check point, tau postu iha dalan, movimentu no patrolhamentu, tamba persiza servisu rutiña no aumenta volume servisu.

“Atu kria asaun konjunta hau ho Administrador organiza enkontru estra-ordinariu  ho Aautoridade  hotu iha Munisipiu Baukau, hodi koalia konaba oinsa atu buka solusaun hodi solusiona problema ne’ebe akontse iha fulan kotuk liuba”, dehan Justinho.

Entretanto Adjunto Komandante Jeral PNTL Interinu Komisariu Afonso De Jesus hateten check point kontinua lao iha fatin-fatin, no operasaun ba grupu ilegais kontinua lao, “PNTL tenke halo check point atu oinsa mak bele identifika grupu sira ne’ebe mak iha dokumentus no laiha dokumentus, no labele utilija sala fali motor no kareta hodi ba oho ema, no soke mate ema liliu iha sidade Dili, polisia tenke tau matan”.