PR Husu Ba komunidade Suku Talitu Atu kontribiu Ba dezemvolvimentu

Aileu, Radio Online, Prezidente da Republika (PR), Taur Matan Ruak, liu husi dialogo ne’ebe hala’o iha loron, segunda feira, 23/02/2015,  iha suku Talitu, Postu Administrativa Laulara, Munisipiu  Aileu, husu ba komunidade atu kontribui ba Dezemvolvimentu iha rai laran.

Xefe estadu  husu ba Komunidade sira iha suku refere hodi servisu maka’as atu kontribui  ba  dezemvolvimentu iha suku laran, “tenki fo kontribuisaun ba dezemvolvimentu iha suco Laran fo apoiu ba responsavel do suco, tamba imi sai hanesan pioneer importante iha suku laran hodi mehi suku ida ne’e nia mehi ba aban bain ruan nian”.

Xefe estadu hateten, nudar lider nasaun ida ne’e, iha dever atu kontribui hadia povu nia moris, “Estadu nia funsaun mak hametin paz no fo bem estar ba sidadaun sira ou  hadia povu nia moris” .

Xefe estadu husu para sidadaun hotu-hotu tau matan ba sira  nia ekonomia, kuda produtu sira hodi sustenta ekonomia familia.

Xefe Estadu hateten, objetivu husi nia vizita ne’e atu halo dialogo ho komunidade sira no hare direitamente kondisaun real ne’ebe komunidade infrenta iha sira nia suku, “Maiu agora hau kompleta ona hau nia mandatu ba tinan tolu no agora dadaun hau vizita ona suco hamutuk atus tolu liu no problema  bo’ot iha nasaun ida ne’e mak edukasaun, saude no Infranstutura, ita tenki servisu maka’s hodi kontribui ba ita nia nasaun, luta ba ukun an ita atinji ona no ohin loron ita tenki luta ba moris diak”.