Aileu, Radio Online, Komunidade Bandudato, Postu Administrativu Aileu Vila, Munisipiu Aileu, Intrega Kilat Musan 147 ba Prezidente Republika Taur Matan Ruak.
Komonidade nebe mak intrega Kilat musan ba Prezidente Republika Taur Matan Ruak mak Bendito da Conceicao alias Leno Dalan nebe nauk kilat musan husi Militar Indonesia iha tinan 1982, wainhira nia hanesan Anak Emas militar ninian iha tempu ne’eba.
Tuir Bento katak kilat musan nebe mak nia rai hakarak intrega Direta ba prezidente Republika tamba hakarak hakerek naran iha historia, tamba ne’e nia parte lakohi intrega ba iha Polisia Nasional Timor Leste, “Rajaun hau rai kilat musan no lakohi intrega ba PNTL tamba hau hakarak intrega direta ba Prezidente Republika, no hau nia naran hakerek iha historia”, dehan Bento ba Jornalista hafoin Intrega kilat musan ba Prezidente Republika taur Matan Ruak nebe Prezidente Intrega tutan ba PNTL Munisipiu Aileu iha loron 26/02/2015.
Nia hatete kilat musan ne’ebe mak nia rai durante ukun an, informa ona ba Policia Nasional Timor Leste katak rai hela kilat musan maibe lakohi intrega ba PNTL ho rajaun hakarak intrega ba Prezidente da Republika tamba kilat musan ne’ebe mak rai naok husi Militar Indonesia.
Bento Hatete Kilat musan nebe mak nia konsege naok husi Militar Indonesia iha tinan 1982 hodi ajuda Falintil sira iha ai laran hodi halo funu, atu intrega tan iha tinan 1999 maibe funu remata ona nune subar too ohin loron.
“ Hau rai kilat musan nee’e hau fo hatene hotu ba polisia sira, maibe hau dehan katak, kilat musan Ne’ebe mak iha hau sei intrega wainhira Prezidente mai vizita hau nia suku mak hau intrega direta ba Prezidente hodi nune’e hetan rekonesementu housi Prezidente tamba hau mos ema rezistensia”, dehan Bendito.
Ba kestaun ne’e Prezidente Republika Taur Matan Ruak husu komunidade sira atu intrega sasan kroat ne’ebe mak iha ba PNTL tamba Timor Leste iha lei ne’ebe bandu sidadaun sira rai no subar sasan kroat.
“Hau husu ba maluk sira atu hatama sasan kroat sira ne’ebe mak iha, kuandu PNTL sira buka mak hetan, imi sei hetan kastigu, tamba ne’e, intrega ba PNTL, sira hetan sei kastigu, tamba kontra lei”, dehan Taur.
Nune mos Komandante PNTL Munisipiu Aileu Superintendente Damiao da Silva Correia hatete, komunidade sira ne’ebe mak intrega kilat musan ne’e signifika katak sira koopera ho parte Seguransa ho komunidade sira.
“Hau husu ba komunidade hotu-hotu ne’ebe mak sei rai kilat, kilat musan inklui sasan kroat tenki intrega ba Komandu Polisia ou intrega ba iha ofisial Polisia suku”, dehan Damiao.
Nia hatete tan katak kuandu iha sasan ne’ebe kroat hakoi iha fatin ruma, fo hatene ba PNTL, dada Police line depois mak polisia sira ba foti fila fali.
