Dili, Radio Online, Ministeriu Justisa (MJ), sei instala tan sentru tratamentu Billete Identidade (BI), iha Munisipiu haat (4), antes fulan Marsu remata .
Ministru Justisa, Ivo Valente, kinta feira, 05/03/2015 iha Palasiu Prezidente, Aitarak laran, informa ba jornalista sira, sei loke tan sentru iha Munisipiu balun atu halo atendementu diak liu tan.
“Kona ba Billete de Identidade, ita sei haluan tan atendimentu iha Munisipiu sira iha tempu badak, Fim de mes ida ne’e ita sei loke iha Baucau, Ermera, Viqueque no Lospalos”, hateten Ivo Valente, Hafoin hasoru malu ho Prezidente, Taur Matan Ruak.
Nia hateten, iha parte seluk nia mos koalia ho Xefe Estadu konaba konsellu kordenasaun iha setor Justisa, oinsa atu reforma setor ne’e rasik .
Nia akresenta liu tan Xefe Estadu mos enkoraza nafatin Seitor Justisa atu bele aselera liu tan papel justisa, liliu asesu ba justisa iha formal nian .
“Xefe estadu enkoraza nafatin ami atu nune’e ami bele aselera liu tan papel Ministeriu Justisa nian ho diak”, dehan Ivo Valente.
Ministru Justisa, klarifika liu tan katak ba futuru iha posibilidade koopera mos sistema justisa informal, atu ajuda sistema formal buka solusaun ba sidadaun nia problema.
