Dili, Radio Online, Sekretaria Jeral Partidu Fretilin, Dr, Mari Alkatiri, husu ba públiku atu defende paz no estabilidade iha rai laran no labele subar ema ne’ebe estraga estabilidade nasaun nian.
“Publiku labele hanoin katak ne’e hanesan uluk ita luta kontra kolonial ne’ebe ita uja kladestina, maibe agora ita hotu nia obrigasaun atu defende estabilidade no paz iha nasaun ida ne’e” dehan Alkatiri Ba Jornalista sira iha Palasiu Prezidente, Aitarak Laran, Tersa Feira 10/03/2015.
“Hanesan partidu ne’ebe hari Estadu ida ne’e nia misaun klaru, Se mak kontra estadu, estadu tenki atua uja forsa ne’ebe iha, atu kontrola situasaun” dehan Alkateri.
Alkatiri haforsa liu tan durante ne’e estadu halo ona aprosimasaun ho Mauk Moruk, hodi dalan dialogo nian maibe laiha solusaun, “halo aproximasaun ita halo tiha ona ,maibe liaha solulusaun nia resposta ba aproximasaun mak uja kilat hasoru polisia estadu signifika katak aproximasaun no dialogo labele ita tenki uja forsa hasoru ”.
Alkateri, hatutan ita halo ona esforsu bo’ot ida atu ita nia rai ne’e manan estabilidade no paz iha rai laran, tan ne’e ita labele fo fali grupo ida ho se deit atu mai sobu estabilidade iha ita nia nasaun.
Nia hateten, Grupo Mauk Moruk, nia asaun ne’ebe hakanek polisia, sunu kareta polisia nian no hatauk povu ne’e signifika katak nia halo problema ho estadu tan ne’e labele tolera.
“Problema laos ema nain rua nian, entre Xanana Gusmão ho Mauk Moruk nian, sira problema liu tiha ona, kuandu komesa ona ataka polisia, no sunu kareta polisia no hatauk ona povu, ne’e signifina kontra nasaun”, dehan Alkatiri.
Alkateri mos husu ba polisia Intelejensia sira hala’o funsaun ho diak, “iha tempu paz no estabilidade ne’e dala barak polisia intelejensia sira dukur, bainhira tempu manas mak sira foin loke matan uituan, tan ne’e husu ba intelejensia sira atu labele dukur ”, tenik Alkatiri.
