Afonso : Kaptura Ona Ema Nain 7 Autor Kazu Laga.

Dili, Radio Online, Polisia halo hela  prossesu  investigasaun ba  Autor nain 7 (hitu) ba kazu ne’ebe akontese iha Postu Administrativu Baagia, iha loron 8 fulan Marsu madrugada ne’ebe hakanek eskoltu prezidente Parlamentu Nasional nain tolu inklui membru eskuadra Baagia nian ida, dehan Komandante Jeral Interinu Komisariu Afonso de Jesus, iha Kuarta-feira 11/3/2015, iha Kuatel jeral.

Komandante Jeral Interinu Komisariu Afonso de Jesus hateten, inisiu akontesimentu kaptura ona ema nain 7 hodi halo investigasaun, “polisia sira kaer ona ema nain 7 inisiu iha loron akontesimentu ne’e too agora, sira iha hela prossesu investigasaun, liu husi prossesu mak ita bele identifika no bele hatene”, dehan Afonso.

Komandante Jeral Interinu ne’e dehan tan, tebes duni grupu Mauk Moruk lori mos ekipamentu sira ne’ebe halo komunidade sira trauma, hanesan Granada, “sira lori duni ekipamentus, granada, buat sira ne’e sei junta hamutuk iha investigasaun, sai hanesan evidensia ida”, tenik Afonso.

Komandante Jeral Interinu husu ba komunidade sira husi joven too ferik katuas atu koopera hamutuk ho polisia liu husi imformasaun hodi kontribui ba estabiladade no husu polisia nia prezensa wainhira hare akontesimentu ruma mosu iha fatin ruma.