Dili, Radio Online, Komunidade Suku Lisapat, Postu Administrativu Hatulia, Munisipiu Ermera kestiona estrada bo’ot diresaun Gleno - Hatulia, ba Jornalista sira iha Tersa 10/3/2015, iha Suku Lisapat.
Madalena dos Reis komunidade Suku Lisapat, hanesan mos emfermeira ida, sente triste wainhira hare infra-estrutura iha suku refere ladiak, “Hau sente triste tebes, dalaruma hau tanis, kuandu hau tula pasiente sira ou inan isin rua sira ne’ebe atu partus ba iha postu de saude Fatubolu, dalaruma partus deit iha dalan klaran no lakonsege salva bebe, tamba deit kondisaun dalan”, dehan Madalena.
Iha fatin hanesan Shefi Suku Lisapat Julio do Rosario Lemos, hateten, dadauk hetan ona ajudus ba hadia Estrada husi Internasional Labour Organization (ILO), “hetan ona apoiu husi ILO maibe ladauk hahu, tamba implemntasaun tuir Kriteria ILO, komapña ne’ebe manan tender atu responsabiliza projeitu ne’e, tenke tuir uluk treinamentu fulan tolu hafoin bele implementa”, dehan Julio.
Julio espera fulan tuir mai bele implementa ona projeitu refere, tamba komunidade iha suku refere maioria moris ho kafe, no produtu balun husi toos, “komunidade iha produtu lokal barak, maibe sira labele ba iha merkadu tamba kondisaun estrada ladiak, produtu ne’ebe sira hetan, sira han deit, labele assesu ba merkadu tamba dok”, tenik Julio.
