Governu Tenke tau Prioridades ba Komunidade iha Area Rural.

Dili, Radio Online, Luta hamutuk halo konferensia imprensa konaba kondisaun infraestrutura  nivel rurais ne’ebe grave, iha loron Kinta-feira 12/3/2015, iha salaun Luta Hamutuk, Farol.

Luta hamutuk halo vizita ba munisipiu haat hodi hare kondisaun infrastrutura bazika iha munisipiu haat, durante vizita luta hamutuk konsege identifika kondiaun infraestrutura ne’ebe mak bele konsidera grave no presija iha atensaun imediata husi parte ne’ebe kompotente.

Luta Hamutuk identifika ona iha munisipiu Bobonaro, Estrada liga Kapital Maliana ba postu adminstrativu Lolotoe ho distansia 40 KM, hatudu katak kuaze 80% laiha kondisaun atu fasilita transporte publiku.

Tuir Luta hamutuk nia hare kondisaun Estrada entre Kapital Maliana ho Postu administrativu Lolotoe, afeita makaas ba vida komunidade sira iha postu administrativu refere.

Tuir imformasaun ne’ebe Luta Hamutuk rekolla, komunidade sira iha postu administrativu Lolotoe prefere liu atu faan sira nia produtu lokal iha baliza ou  Fronteira Indonesia ne’ebe besik ho diastansia 2 KM,(Aktividade negosiasaun ilegal) duke too iha kapital munisipiu ho distansia ne’ebe dook,  kondisaun Estrada ladiak no laiha transporte publiku, aluga motor (OJEK) selu U$ 40-U$50.

Luta hamutuk mos halo identifikasaun husi munisipiu Ermera, estrada liga entre suku Matata ho Leorema, kuaze 100 % grave, nune’e labele fasilita transportasaun publiku, inklui ambulansia labele tama tula moras emergensia.

Kondisaun hirak ne’e implika makaas ba komunidade suku Matata too suku Leorema, estrada refere desde hahu ukun an ate agora seidauk hetan rehabilitasaun. preokupasaun Povu husi Munisipiu Ermera.

Luta Hamutuk halo mos identifikasaun iha munispiu Kovalima, komunidade Fohorem la bele assesu ba transporte publiku ba kapital Kovalima tamba kondisaun estrada entre  Postu administratvu Fohorem ho Kapital Kovalima ho distansia 38 KM, kuaze 90% at, ho obrigasaun komunidade sira husi Postu administrativu refere tenke lao ain deit. 

Luta hamutuk identifika mos ba prekupasaun Komunidade husi Munisipiu Manufahi, Suku Lesuata no Fatukalo potu administrativu Lolote, Komunidade sira uja deit kuda hodi assesu ba Kapital Manufahi, tamba laiha konstrusaun estrada.

Kondisaun hirak ne’e sai bareira mos ba atividade importansia sira, liga mos komunidade nia interese, aleinde la assesu estrada, komunidade iha suku refere mos infrenta kondiasaun seidauk assesu ba eletrisidade, Saude no bee mos.

Luta hamutuk Rekomenda Bazeia ba prekupasaun hirak ne’e, ba VI Governu konstituisional atu toma atensaun hodi halo asaun imediata, liu husi politika OGE 2015, tamba kondiasaun hirak ne’e konsidera grave ou emerjente duni.

Luta hamutuk husu Ba Miinisteriu Obras Publika, Saude no Edukasaun, atu identifika no tau importansia ba area rurais sira ne’ebe mak sei enfrenta kestaun nessesidade bazika iha planu annual 2015, atu bele kria kondisaun ba sira.