Horta Husu Ba Mauk Moruk Entrega-An Ho Dalan Dignidade

Dili, Radio online, Prezidente Komisaun Indepedente Alto- Nivel Nasoens Unidas Operasaun  ba Paz, Dr. José Ramos Horta husu ba Mauk Moruk (Paulino Gama), diak liu entrega-an,  kontribui atu nasaun ne’e bele hakmatek.

“Mauk Moruk diak liu  entrega-an ba Forsa, se karik lakohi entrega-an ba forsa entaun manda mensajem ba Guvernu no Prezidente da Republika katak hakarak entrega-an maibe ho dalan dignidade hodi nune’e Guvernu haruka delegasaun ba simu nian maibe la uja armas,  dehan  Premiadu Nobel da Paz,  ba jornalista sira hafoin hasoru malu ho Prezidente da Republika, Taur Matan Ruak, iha Palasiu Prezidenti, Aitarak-Laran Dili, Kinta feira, 19/03/2015. 

Horta hateten, Mauk Moruk, sofre moras iha parte Ulun, tan ne’e nia iha emosaun ne’ebe maka’as tebes, durante luta dala ruma buat kiik mos nia tiru.  

“Nia hanesan hau nia alin ida ne’ebe  hau konhese diak, nia uluk iha laga, nia ema ida ne’ebe sofre moras iha ulun, desde iha tempu luta, nia iha emosaun ne’ebe maka’as teb-tebes, buat ruma kiik oan nia tiru ”.

Horta, hatutan Mauk Moruk, tenki hatan ba iha Tribunal tamba halo ona asaltu ba iha instituisaun ba Estadu nian, bainhira Tribunal foti dezisaun mak bele hare nia kondisaun mos hodi fo perdaun ba nian.

“Ne’e duni hau husu ba hau nia alin fila mai Dili, entrega-an, halo asaltu ba institusaun estadu nian, tenki hatan ba justisa, bainhira Tribunal halo dezisaun mak ita bele hare no komprende situasaun no saude, ita bele fo perdaun, haruka fila ba uma deskansa no hare familia, labele halimar ho politíka”, dehan Horta.

Horta esplika liu tan katak, Mauk Moruk halo nia ejijensia, atu disolve Parlamentu no muda konstituisaun, ne’e bele, maibe tenki liu husi prosesu demoratiku, se mak manan  elisaun maioria Dois Terços bele muda.