
Dili, Radio Online-Tuir rezolusaun ne’ebe fo sai husi konsellu Ministru, FFDTL-PNTL Sei halo Operasaun ho naran HANITA (operasaun em jeral) ba Komandante KRM Mauk Moruk ho nia Grupu, PNTL Hamutuk 400 resin sei Aloka iha Sabadu semana ne’e, ho apoiu husi FFDTL, imforma fontes komfirmadu, iha Sesta 19/3/2015, Kuartel Jeral PNTL.
Tuir Fontes komfirmadu ne’ebe lakoi fo sai naran ba publiku nee hateten, Forsa Falintil Defeza Timor-Leste (FFDTL) ho Polisia Nasional Timor-Leste (PNTL) koopera hamutuk, sei aloka membru 400 resin ba halo operasaaun ba Mauk Moruk ho nia Grupu, operasaun ne’e sei hahu iha sabadu semana ne’e 21/3, Operasaun ne’e sei halao iha Munisipiu Bagia inklui mos 13 munisipius.
Tuir nia (fontes komfirmado), “hanoin tempu too ona para FFDTL-PNTL atu halo operasaun ba Paulinu Gama alias Mauk Moruk ho nia grupu, bazeia mos ba rezolusaun ne’ebe hasai husi Konsellu Ministru”.
““Membru PNTL 400 resin ne’ebe koloka ona, mai husi komando munisipiu ida-idak, kada munisipiu apoia nia membru nain 5, membru husi munisipiu ida-idak sei mai ho sira nia kareta rasik, membru sira ne’e oras ida ba koloka hamutuk ho membru FFDTL no sei konsentra hamutuk iha Kuartel jeral FFDTL mak sei aranka”, imforma fontes komfirmadu ne’e.
Iha parte seluk reprezentante povu, iha uma fukun Parlamentu Nasional Deputadu Manuel Gaspar Soares hateten katak, FDTL ho PNTL tenke apoiu malu wainhira halao operasaun, karik la apoiu malu, maka susar tebes atu kaptura grupu deskonesidu sira nee.
Tuir Deputadu Manuel, “operasaun halo iha tempu badak diak liu, atu nunee bele kaptura ema nebe gosta estraga pas no estabilidade iha rai laran, maibe operasaun atu lao ho diak, importante mak Forsa rua ne’e tenke kordena malu halo metin, no monta estratejia halo didiak atu nune’e bele hetan rejultadu diak, presija mos preparasaun, strutura, estratejia”, informa Manuel.
Jornalista radio liberdade koko komfirma ona ho parte FFDTL atu propoin membru nain hira apoiu operasaun ne’e, maibe laiha imformasaun tamba ne’e segredu seguransa nian.
