Dili, Radio Online, Vice Ministru Obras Públikas, Transporte no Komuniksaun, Inácio Moreira, Segunda feira 23/03/2015, iha Kaikoli, hateten tinan ida ne’e guvernu sei kria eskola ba kondutor sira hodi nune’e sira iha konesementu ba kode etika lori kareta iha estrada.
“iha tinan ida ne’e guvernu sei organiza, atu loke eskola ba kondutores sira, ne’e hanesan obrigatoriu, ba oin se deit mak hakarak lori kareta tenki eskola lai, agora dadaun ami sei perpara baze legal hodi kria dekretu lei atu nune’e sira bele hatene kode etika lori kareta iha estrada”, dehan Moreira.
Nia hateten, eskola ba kondutores ne’e, nia durasaun minimu fulan tolu no masimu tinan ida, antes sira hetan karta kondisaun tenki hetan uluk sertifikadu, ne’e hanesan parte ida hodi kapasita liu tan kondutores sira hodi komprende diak etika lori kareta, “Durante ne’e kuaze kondutor sira laiha kapasitasaun, balun lori pasajeirus mos fuma, ba kondutores sira tula ona pasajeirus labele fuma. hakarak halai neneik, tenki halai husi ninin. dala ruma kondutor sira lori kareta halai iha dalan klaran depois loke tan muzika no halai neneik, ema iha kotuk hakarak halai lalais mos ladiak, ida ne’e tamba falta kapasitasaun”, dehan Inácio Moreira.
Nia esplika ba kondutores sira ne’ebe mak dadaun lori ona kareta, ne’e sei halo fali avaliasaun no sira mos sei tuir fali eskola ho tempu badak, tamba sira iha ona esperensia.
Inácio Moreira, esplika programa ne’e laos serbisu hamutuk ho Ministériu Edukasaun, maibe ida ne’e responsavel husi Diresaun Nasional Transporte no Trestre (DNTT), ida ne’e hanesan conduce of training hodi kapasita deit kondutores sira.
