Komisaun E, Husu MOPTK Kria Dekretu Lei Hodi Regula Transporte Públiku

Dili, Radio Online - Prezidenti Komisaun E, Pedro da Costa Martires, husu ba Ministru iha Ministériu Obras Públikas, Transporte no Komuniksaun (MOPTK), atu kria dekretu lei ruma hodi regula tarefas transporte Publiku.

“Tarefas transporte Públiku,  ida ne’e problema integradu presija lei ruma atu regula, tuir lolos ministeriu kompetente iha dekretu lei atu regula presu tranporte hare mos ba distansia, besik selu baratu no do’ok mak selu karun,  no mos hare ba kualidade, liliu ba taxi sira tenki mo’os no edukakadu” dehan Deputadu Pedro ba jornalista radio liberdade, Sesta Feira 20/03/2015 iha uma fukun parlamentu Nasional.

Hatan ba preukupasaun ne’e, Vise Ministru Obras Públikas, Transporte no Komuniksaun, Inácio Moreira, Segunda feira 23/03/2015, iha nia knar fatin Kaikoli, hateten dadaun ne’e guvernu ne’e halo hela planu atu regula presu tarefas transportes publikus nian, maibe dadaun ne’e Parte Diresaun Nasional Transporte Terestre  (DNTT), sei halo estudu ida hodi konsulta kondutores sira no halo analiza hafoin difine tarefas transporte publiku tuir nia distansia, tantu ba Munisipiu. 

“Hau hanoin tarefas transporte publiku, urjentemente tenki publika ona, maibe parte DNTT sei halo estudu ida hodi husu transporte públiku hodi sira ne’ebe maibe ba Munisipiu sira, atu halo kalkulu hodi hare ba gastus ne’ebe iha, ba kombustivel, no mos manutensaun kareta nian, iha semana ida ne’e sei hamosu tabela tarefas transportes publiku, no sei kria mos dekretu lei atu regula transporte publiku sira”, dehan Moreira.

Inacio Moreira, hatutan, ba taxista sira iha ona asosiasaun,  sira hahu, guvernu sei fo konsellu ba sira hodi monta argometer ba kada Taksi hodi nune’e pasajeirus sira selu tuir distansia ne’ebe iha. 

Nia mos husu ba Taksi nain sira hodi hare mos ba kondisaun taksi nia, tamba durante ne’e taksi balun nia kondisaun ladun diak.