Dili, Radio Online, “Ohin loraik hau tuir enkontru ida iha Hotel Novu Turismu, Fila liu husi Largo Licidere, hare ambiente oin seluk, ema laos faan kareta maibe buat oin-oin”, dehan Deputadu Fransisco Branco, iha linha Social Facebook, ne’ebe mak publika iha loron 15/03/2015.
Iha plenariu segunda feira 23/03/2015, problema ida ne’e sai preokupasaun ba Deputadu, Bianco, hodi levanta iha plenaria, nia hateten Largo Lecidere, konsidera hanesan fatin publiku, no jardin rekreasaun ba sidadaun ne’ebe hela iha Dili, no fatin ne’e mos konsidera hanesan fatin Santuariu maibe ema barak mak utiliza sala, iha ne’eba bele hamosu imajinasaun kona ba seksu Livre.
Hafoin sesaun plenaria, Jornalista Radio Liberdade, dadalia ho Deputadu Fransisco Bianco, nia hateten, iha loron Domingu liu ba, nia lao husi Largo Lecidere, nia hare mane ida ne’ebe tur ho feto nain tolu ne’ebe nia gestu atu fa’an fali feto ne’e.
“Hau liu husi Largo, hau hare ita nia maluk mane nia aspektu atu fa’an fali feto nain tolu ne’e, hau hanoin ita tenki estabele regras ruma hodi regula aktividade sira hanesan no hau rekomenda ona ba autoridade kompetente hodi hare ba kestaun ne’e, buat hotu tenki iha nia fatin”, Dehan Deputadu Bianco.
Nia hateten Largo Lecidere, hanesan fatin santuáriu ne’ebe mak tinan-tinan Igreja Katólika, halo aktividade rituais iha ne’eba, tan ne’e ita tenki respeita ba fatin Santuáriu sira, tamba Timor-Leste Maioria relijiaun Katólika.
“ita nia país kuaze 100% relijaun katólika, ita tenki tau ita nia dignidade nudar povu ne’ebe mak maoria katólika iha rejiaun ida ne’e, labele halo aktividade sira ne’e iha fatin Santuáriu, liliu espasu ida iha kedas Nossa Senhora nia ain, ita merese respeita ”, Dehan Deputadu Bianco.
Nia hateten, Largo Lecidere mos hanesan fatin Istoriku ba povu Timor-Leste.
Nia husu ba siguransa sira, ne’ebe monta iha largo lecidere, atu hare mos aktividades sira hanesan ne’e.
