Dili, Radio Online, Autor ba kazu krime kontra Komandante Polisia Servisu Investigasaun Krime(PSIK) hetan ona desizaun Tribunal no liberdade kondisional, dehan Komandante PSIK Ludgerio Lay, iha Tresa-feira 24/3/2015, iha knar fatin Kuartel PNTL, Kaikoli, Dili.
Komandante PSIK Ludgerio Lay imforma katak, autor ba kazu ne’ebe kontra komandante PSIK hetan ona liberdade kondisional no kada semana ida dala rua, sira sei ba hatan iha komando polisia ne’ebe besik.
“Aleinde autor nain haat ne’ebe ba hatan iha komando polisia kada semana, sei iha prosesu investigasaun hodi buka tuir autor nain haat seluk ne’ebe to’o agora seidauk ba intrega an iha komando polisia”, dehan Ludgerio.
Entretanto Komandante PSIK Ludgerio Lay hanesan Vitima sente triste, liuliu hanesan superintendente ida mak ema baku, maibe tribual fo desizaun hanesan ne’e, loron seluk ema seila respeita polisia.
“Espera katak tribunal no ministeriu publiku sei foti desizaun ne’ebe mak diak, autor sira liberta la signifika katak kazu ne’e taka ou remata, maibe sei kontinua hodi kompleta”, tenik Lay.
Ludgerio akresenta, ami sei servisu hamutuk ho tribunal no Ministeriu Publiku, hodi foti desizaun no fo suspensaun ba autor sira ne’e.
