Traballador Estranjeiru 4000 Resin Viola Vistu Turista

Dili, Radio Online, Ministeriu Interior konsege fiskaliza ona ba traballador estranjeiru sira ne’ebe maka uja vistu turista, dehan Ministru Interior iha sesaun debate Parlamentu Nasional, Kuarta 25/3/2015, Parlamentu Nasional.

Governu liu husi Ministeriu Interior kria ona ekipa ida hodi kontrolu sidadaun estranjeiru sira ne’ebe tama sai rai laran no atu hatene didiak sidadaun estranjeiru sira ne’e nia objektivu tama mai rai ne’e saida.

Minstru Interior Longinhos Monteiro imforma, Ministeriu Interior kria ona ekipa ida hodi halo kontrolu ba ema estranjeiru sira ne’ebe mak tama sai iha ita nia rai laran liu-liu traballador estranjeiru.

“Durante semana rua liu ba iha fulan marsu nia laran, ekipa task force konsege rejistu ema estranjeiru sira ne’ebe tama mai iha Timor-leste, traballador estranjeirus hamutuk 20.458, no atus 4000 resin viola vistu turista ba vistu traballador”, dehan Longinhos.

Longinhos akresenta tan, “ami mos halo ona koordenasaun ho  embaixada sira hotu atu bele fo dadus ne’ebe loos, atu nune’e bele halo fiskalizasaun ba ema sira ne’ebe mai halao aktividade iha ita nia rain”, tenik Longinhos.

Nia afirma tan, nia halo ona komfirmasaun ou koalia ona ho embaixador China, Indonesia no Portugal, tamba hare ba sidadaun estranjeiru sira husi nasaun tolu ne’e mak aas liu viola vistu turista.