Dili, Radio Online, Polisia Nasional Timor-leste (PNTL) Komemora Loron Aniversariu ba dala 15, Iha Sesta-feira, 27/3/2015, iha Sentru Formasaun Polisia Akademia Komoro.
Primeiru Ministru Rui Maria hatete, Seguransa no Sosiedade Demokratiku, buat rua ne’ebe susar atu hafahe.
“seguransa maka elementu esensial ida, husi konfiansa ba instituisaun, konfiansa ba autoridade estadu, no konfiansa iha estadu ninia kbiit atu prevene no reprimi kriminalidade, iha âmbitu respeitu ida ne’ebe eskrupulozu duni, ba liberdade, direitu no garantia sidadaun sira”, dehan Primeiru Ministru.
PM Rui hateten tan, Hau nia felisitasoens ba PNTL ne’ebe selebra loron aniversariu ba dala 15, hau nia hakoak boot no konfiansa no serteza iha future ne’ebe diak liu, ba membru PNTL hotu ne’ebe namkari iha Timor-leste laran tomak.
Iha fatin hanesan Komandante jeral Julio Hornai hateten, loron Aniversariu PNTL nian hanesan loron ne’ebe importante tebes ba Polisia Nasional Timor-leste, hodi marka tan historia ida iha instituisaun PNTL nia laran.
“PNTL selebra ona tinan 15, karik hanesan ema ida, sai ona joven, nia bele deside ona ida ne’ebe loos no ida ne’ebe mak sala, iha PNTL bele rekonhese nia an, atu ita bele mellora erus sira ne’ebe mak iha”, dehan Julio.
KOMJER Julio husu ba membru Polisia sira hotu atu servisu ho laran badinas, tenke sakrifika an hodi servisu makaas atu assegura ita nia nasaun Timor-leste.
