Dili, Radio Online, Liu husi Reuniaun konsellu Ministru deside Julio Hornai sai Komandante Jeral Polisia Nasional Timor-Leste, no Faustinho da Costa sai Segundu Komandante Jeral, iha VI Governu Konstituisional, bazeia ba meritu no professionalismu ne’ebe mak figura rua ne’e iha no Simu ona tomada de posse ofisialmente husi PM Rui Maria, Sesta 27/3/2015, iha serimonia PNTL ba dala 15, iha Akademia PNTL Komoro.
Eis Komandante Sentru Formasaun Polisia(SFP) no Atual Komandante Jeral da PNTL Komirsariu Julio Hornai hateten liu husi nia diskursu katak, maske kargu ida ne’e la fasil no todan teb-tebes, hanesan sidadaun ida ne’ebe hadomi nia nasaun prontu simu ho responsabilidade masimu.
“hau hanesan komandante jeral nomeadu, hau sente todan teb-tebes simu kargu ida ne’e, maibe ho suporta no motiva ne’ebe mai husi kolega no familia, katak simu knaar ho responsabilidade ne’ebe masimu, bele ka labele ministru tutela mak sei avalia, hau simu konfiansa tomak husi governu no sei halao hau knar tomak tuir kapasidade ne’ebe mak hau iha”, dehan Julio.
Julio dehan tan, Komandante jeral no segundu komandante jeral mesak seila bele halo buat ida, maibe husu ba Ofisias sira hotu atu koopera hamutuk atu servisu makaas, hodi garantia estabilidade ba povu no nasaun ida ne’e, lori mos instituisaun PNTL ne’e ba oin.
Iha fatin hanesan Primeiru ministru Rui Maria de Araujo hatoo, ba KOMJER no adjunto KOMJER deseja felisidade iha funsaun importante, ejizente no defisil, ne’ebe hetan fiar atu halao.
“Tomada de posse ba Komandante jeral no 2º komandante jeral foun PNTL nian, nu’udar pasu ida tan ba dezenvolvimentu instituisaun Polisia nian, liu-liu nu’udar sinal konfiansa ne’ebe deposita iha ofisial superior sira husi instituisaun PNTL nian, Hanesan mos aposta ida iha lideransa ida ne’ebe forti no bele halao disiplina iha PNTL nia laran”, tenik PM Rui.
Eis 2º komandante jeral Afonso de Jesus hateten, pronto atu fo apoiu ba Komandante jeral no 2º komandante jeral PNTL foun.
“husu ba KOMJER no 2º KOMJER PNTL foun atu bele halao nia funsaun ho didiak ho flexibilidade no garante estabilidade ba sidadaun hotu-hotu, lhalao knaar labele uja arogansia”,dehan Afonso.
