Dili, Radio Online, Organizasaun Empreza Sosial Sport Impact ho misaun promove dezenvolvimentu humanu liu husi desportu, halibur joven sira husi grupu oi-oin, hodi komemora loron mundial desportu liu husi aktividade pratika desportivas, iha Sabadu 28/3/2015, iha Estadio Munisipal Dili.
Nuno Delicado Director Sport Impact hateten, Organiza eventu ida ne’e atu selebra loron mundial desportu ba dame no dezenvolvimentu.
“Loron ne’e importante ba asembleia jeral Nasoens Unidas nia desidi, atu selebra no promove desportu, hanesan fundamenta atu dezenvolve rekursu humanu no mundu, nomos promove dame no dezenvolvimentu”, dehan Nuno.
Nuno akresenta tan, “atu komemora loron mundial desportu ne’e, ami konvida mos joven sira hotu-hotu atu mai partisipa, inklui mos husi eskola pre-sekundaria no sekundaria hotu-hotu iha Dili laran, aleinde ami mos fo avizu ba joven sira iha territoriu Timor laran tomak liu husi sms iha linha Telemovel atu mai partisipa ihaeventu ne’e”, tenik Delicado.
Iha Fatin hanesan Mateus do Santos imforma, nu’udar joven sente kontente tebes ho eventu hanesan ne’e, tamba liu husi aktividade hirak ne’e bele kria mos amizade entre joven sira husi grupu oi-oin.
“Hau nu’udar joven orgullu halo aktividade hanesan ne’e, tamba liu husi aktividade sira ne’e bele kria mos paz no amizade, se bele governu kria aktividade kompetisaun joven sira nian, ne’e para minimiza tiha instabilidade sira iha ita nia rai laran, iha problema mosu bar-barak tamba joven barak mak laiha aktividade atu halao”, dehan Mateus.
