Dili, Radio Online, Bispo Diocese Baucau, Dom Basilio do Nasimento, hateten maske Sarani katolika iha Timor-Leste lakon nia bibi atan diak ida maibe igreja Katolika sei laiha rohan.
Dom Basilio do Nascimento, hato’o lia hirak ne’e ba jornalista radio sira, segunda feira, 06/04/2015, hafoin lori matebian, Bispo, Dom Alberto Ricardo da Silva, iha fatin deskansa, iha Maloa, Fatumeta.
Nia orgullu ho manifestasaun sarani katolika nian ne’ebe hatudu ba Bispo Dom Alberto Ricardo, durante Moras to’o hakotu nia iis, no lori nia ba fatin horik fatin eternu nian.
“sarani katalika mak fo fali mensajem ba igreja katolika katak sira iha nafatin, lao akompaña lao ain husi Licidere to’o Fatumeta, lakotu, ho ida ne’e hau bele dehan katak los ita lakon bibi atan ida maibe sarani katolika sei nafatin iha nafatin”, dehan Bispo Dom Basilio do Nascimento.
Nia hateten wainhira nia halo vizita ba dala ikus, iha Tersa Feira 31/03/2015, matebian, Dom Alberto Ricardo, enkonraza nia atu forsa nafatin atu hala’o kna’ar.
“Molok nia hakotu iis, iha tersa feira hau vizita nian, nia dehan mai hau, forsa, korazen nafatin, nia dehan Nia fatin iha ona ” dehan Dom Basilio do Nascimento.
Nia hateten nia triste lakon nia maluk bibi atan maibe iha parte seluk nia kontetenti tamba Dom Alberto Ricardo, nia klamar iha Lalehan.
Relasiona ho kondekorasaun ne’ebe guvernu Timor-Leste, fo ba matebian Dom Alberto Ricardo, ba nia kontribusaun luta, iha loron 6/04/2015, iha Igreja Katedral Dili, molok lori matebian ba halo’ot iha fatin eternu nian, Dom Basilio do Nascimento, hateten tradisaun husi igreja katolika nian , amu lulik barak mak partisipa luta, maibe dezisaun ne’ebe sira hola katak bainhira sei moris lasimu ne’e sei lasimu, maibe mate ne’e buat ketak ida.
