Membro da Câmara dos Deputados do Parlamento Japones no Assesor Espesial ba Primeiru Ministru Japaun, Taro KIMURA, Vizita Timor-Leste

Dili, Radio Online, Membro da Câmara dos Deputados do Parlamento Japones no Assesor Espesial ba Primeiru Ministru Japaun, Taro KIMURA, to’o iha Dili hodi hala’o vizita ofisial ida durante loron 3. Wainhira to’o, nia espresa ninia laran ksolok hodi bele mai vizita Timor-Leste. Eventu primeiru ne’ebe nia atende mak “Sessaun Reportajen JENESYS 2.0” iha Embaixada Japaun nian iha Timor-Leste. Iha ninia deskursu, nia hato’o ba estudante sira dehan nia sente kontenti tebes katak partisipantes JENESYS sira vizita ona sidade lokal sira, inklui mos nia moris fatin Aomori, no espera katak partisipantes JENESYS sira sei fahe sira nia esperensia hirak nee ho sira nia kolega no komunidade, no sira sei sai hanesan ponti entre nasaun rua nee, komunikadu imprensa ne’e Radio Liberdade Dili simu via email iha loron 6/5/15.

Iha 6/5/15, Kimura halo vizita kortezia ba Rui Maria de Araujo, Primeiru Ministru Republika Demokratika Timor-Leste no Hernani Coelho, Ministru dos Negosius Estranjeirus no Koperasaun Republika Demokratika Timor-Leste. Iha sorumutu rua nee, Kimura espressa ninia respeitu ba Timor-Leste ninia implementasaun harii nasaun nian ne’ebe mak basea ba demokrasia, no salienta katak Japaun hakarak atu desenvolve liu tan relasaun ne’ebe mak orientada ba future, favoravel no besik liu tan entre nasaun rua nee liu husi suporta Timor-Leste ninian esforsu hodi promove desenvolvimentu total. 

Aleinde sorumutu hirak nee, Kimura vizita mos eskola primaria no sekundaria Darlau iha Dili iha ne’ebe ONG Japones ida ho naran SHARE hala’o dadaun sira nia servisu hodi promove programa saude eskolar komesa tinan 2012. SHARE mak ONG Japones ida ne’ebe mak infrenta problema oi-oin kona ba saude iha mundu tomak, no iha Timor-Leste nia implementa dadaun ninia projeitu saude sira, inklui mos fase liman tinan 10 resin ona. Depois partisipa iha atividades SHARE nian iha eskola, Kimura rasik hatudu jinastika radio Japones, ne’ebe mak famosu tebes ba jerasaun tomak iha Japaun kona ba promosaun saude, no estudante sira mos kontenti ho interkambiu kultural entre Japaun no Timor-Leste. 

Iha 7/5/15, ohin, Kimura sei vizita Buluto hodi atende seremonia lansamentu primeira pedra ba Projetu Rehabilitasaun no Hadiak Eskema Irigasaun Buluto. Projetu nee fiansiadu husi Governu Japaun liuhusi ninia asistensia ne’ebe mak oferese ba Governu Republika Demokratika Timor-Leste ho montante hamutuk kuaze 15 biliaun Yen (mais ou menus USD 12.6 miliaun). Ida nee ho objetivu atu kontribui ba hasa’e Buluto nian valor auto-suficiência alimentar no hametin padraun moris agrikultores lokal sira liu husi rehabilita sistema irigrasaun no hametin Assosiasaun Uza Bee nian.