Abilio Araujo, Lamenta KOK Halo Passa Revista Nia Rezidensia

Dili, Radio Online, Komando Operasaun Konjunta (KOK), iha loron 11/04/2015,  tuku tolu Madrugada, halo passa revista ba rezidensia Abilio Araujo  sem notifikasaun, informa Abilio Araujo ba jornalista sira iha Tersa Feira Semana ne’e, iha palasiu prezidenti Aitrarak Laran, hafoin hasoru malu ho Prezidenti da Republika, Taur Matan Ruak hodi hato’o  keixa  ba Prezidenti  Republika, Taur Matan Ruak, kona atuasaun ne’e. 

 “Ohin hau mai ho hau nia oan nain rua, hasoru prezidenti hodi koalia kona ba foin dadauk KOK ba halo revista iha hau nia uma iha dia 11 Abril  foin dadauk iha tuku 03 madrugada ne’e,” dehan Abilio Araujo, hafoin hato’o keixa hahalok KOK ba PR Taur Matan Ruak.

 “Hau seidauk koalia ba komunikasaun sosias, maibe hau dehan katak buat ne’e labele akontese tan, tanba situasaun ida que  grave, la iha karta ruma husi tribunal,” dehan Nia.

“Ne’e situasaun ida inaseitavel, ne’e koalia legais, hanesan fundador rai  ida ne’e nia ka entermos politiku, ne’e hamoe ita hotu tanba se ita nia forsa sira trata hau hanesan ne’e oinsa trata povu ki’ik sira”, tenik Abilio Araujo.

Tanba ne’e, Abilio husu ba PR Taur Matan Ruak  hodi apela ba seguransa nasaun ne’e atu trata sidadaun tuir lei ne’ebe vigora iha Timor Leste.

“hau dehan ba Prezidente, se trata hau, Abili Araujo, ema ida luta ba rai ida ne’e,  luta sistema demokratiku iha rai ida ne’e, mai iha ne’e tau osan no investe juta hira ba nia rain, ema ida hakarak estabilidade iha rai, mak KOK trata hau hanesan ne’e, ita nia rai ne’e ba iha ne’ebe,  ne’e ulun tun ain sae los, ne’e mak hau dehan ne’e primeiraves no ultimu,” Nia sujere.

Aleinde ne’e, Eis Ministru Koordenador asunto Ekonomia TL iha tinan 1975 ne’e  informa ba Presidente Republika Taur Matan Ruak kona ba investimentu ne’ebe halo iha Timor Leste 

“Hau koalia ho Presidente Republika kona ba investimentu ne’ebee hau halo iha Timor Leste no hau sei kontinua investe no kontribui ba Prosesu dezevolvimentu Timor Leste ,” dehan Nia.