Dili, Radio online, Fernando Ulang ho idade 10 no Beni ho idade 8 hanesan labarik menor idade ne’ebe halao servisu nudar vendedor aifuan, hanesan massan, sabrakano no goiabas, iha area Largo Lesidere, ne’ebe aifuan hirak nee au iha plastic, ba Jornalista Radio Liberdade iha Terca 13/5/15, iha Largo Lecidere, Fernando no Beny haktuir katak sira hakarak ba eskola maibe inan aman laiha kbi’it.
Fernando esplika katak, “lor-loron ho alin sempre fa’an aifuan iha Largo Lesidere, hahu sai husi hela fatin aitarak laran dader tuku hitu(7) to’o lorokraik tuku neen(6) foin fila ba uma”.
“Kada loron Ama ho Apa haruka ami lori aifuan plastik lima, kada plastik ida ho folin $ 1.00 dollar, osan ne’e hodi ajuda Apa ho Ama hola hahan ba ami han,” dehan Fernando.
Husi maun alin nain hat(4) Fernando no Beny mak oan mane bo’ot, nune’e Fernando no Beny mak fa’an aifuan hodi buka osan, “lor-loron ami ba fa’an hahu husi dader to’o lorokraik han deit supermi matak, ami faan hodi ajuda Pai ho Mae no alin sira,” tenik Fernando.
Fernando imforma tan, nia mos hakarak tebes atu ba eskola hanesan nia kolega sira, maibe nia Inan-Aman laiha kbiit atu suporta nia ba eskola.
