Ema Ida, Istoria Ida, Ba Ukun Aan

Dili, Radio online - “Ema Ida, Istoria Ida, Ba Ukun Aan, tema selebrasaun loron FaAILINTIL tinan ne’e”, lia hirak ne’e haktuir husi Xefe Estadu FALINTIL-Forsa Defeja Timor Leste (F-FDTL), Koronel, Falur Rate Laek reprejenta Komisaun organijadora seremonia 20 Agustu, Loron FALINTIL, Forsa Armadas Libertasaun de Timor Leste, ba dala 40, liu husi konferensia imprensa, ne’ebe halao iha salaun konferensia Quartel Jeral F-FDTL, iha loron 12/8/2015.

 “Maluk sira hahu hare dadaun iha sidade Dili no munisipiu 12 no autoridade especial Oe-Cusse, iha ona spanduk, kartajes ne’ebe naklekar ona iha fatin barak, tinan ida ne’e ita halo selebrasaun simplis maibe solene”,  Dehan Falur.

Falur hatutan katak “Ita nia mensajen mos simplis, ita fo obrigadu ba ita nia asuwain FALINTIL, mai ita hotu hamutuk fo onra no fo obrigadu ho lia fuan simplis maka nakonu ho sentimentu ba ita nia asuwain, ita fo obrigadu tamba ho sira nia aten barani, ka korajen, dedikasaun, sakrifisiu ho fiar metin mak ohin loron ita hetan ukun rasik an, ita nia istoria luta libertasaun nasional, ida ne’ebe sura prosesu atu ukun rasik an, nakonu ho sakrifisiu, nakonu ho terus oioin, maibe nakonu mos ho barani maka’as, tuba rai metin, fo liman ba malu, fo fiar no kbi’it ba malu hanesan familia husi uma kain ida deit, ho mehi ida deit mak ukun rasik an, tinan ida ne’e ita sei halao aktividades oi-oin”.   

Nune Carvalho do Santos, Sekertariadu Komisaun Organijadora Komemorasaun loron FALINTIL ba dala 40, informa kona ba aktividade komemorasaun ne’ebe haforsa liutan husi Ines Almeida, Liaison Officer For Veterans Affairs.

Aktividade ba komemorasaun loron FALINTIL 1975-2015 hahu husi 12 ate 21 Agustu ,mak hanesan, Torneiu FALINTIL, Seminariu, Akampamentu estudante universitariu sira, Jornada Istoriku, Seremonia iha Aileu, Desportu Vijilia, Konferensia, Misa omenajen, Seremonia Loron FALINTIL ihaTasi Tolu no iha mos programa extra Arkivu no Muzeu Rezistensia Timorense.

Orsamentu ne’ebe sei gasta ba komemorasaun ne’e mai husi ministeriu hotu ho total oetusentus oitentaseti mil nobisentus e trintatres dolar Amerikanu.