Dili, Radioonline_Xefe Estadu Major Jeneral Falintil-Forsa Defeza Timor Leste, Lere Anan Timur fo sai kronolojia husi Mauk Moruk nia mate liu husi Konferensia da Imprensa ba jornalista sira iha quartel jeral FFDTL, iha loron 12/8/2015.
“Liu husi biban ida ne’e, lori Komando Operasaun Konjunta KOK nia naran, ami relata kronolojia atake husi Mauk Moruk ho ninia elementus sira hasoru membru KOK iha 5/8/2015 iha Aldeia Osowaki, Suco Fatulia, Postu Administrativu Venilale, no atake husi grupu hanesan iha 8/8/2015 Aldeia Watulibu, Suco Watuwako, Postu Administrativu Venilale” relata Maijor Lere.
Maijor Lere hatutan “Forsa iha terenu tenta hodi halo esforsu tomak hodi husu katuas Mauk atu entrega aan, enfelismente katuas Mauk hatete nia sei la entrega an e la kleur deit Mauk Moruk resposta ho tiru, bainhira rona ona desparu tiru ne’ebe Mauk halo, Forsa ne’ebe halo serku hatan ho kontra tiru ne’ebe rejulta katuas Mauk Moruk ho nia elementus nain 2 Mate kedas iha fatin no membru ida ho naran Sergio Boy hetan kanek no konsege kaer moris”.
Hatan perguntas jornalista kona ba retira KOK, Major Lere hatan “ami komesa redus ita nia efetivu iha terenu, depois de katuas Mauk mate ho nia elementus e agora sei iha ne’eba tamba elementus balu hola parte iha grupu sei lao iha ne’eba hanesan Lemorai, Sunardi ho sira seluk”.
Informasaun kona ba Lemorai lao ho kilat bo’ot AK 43 Major Lere la fiar katak “ne’e informasaun deit, KOK rasik la hetan’.
Maijor Lere mos informa kona ba kondisaun elementus KOK ne’ebe hetan tiru agora dadauk hahu rekopera.
Komandante Jeral Polisia Nasional, Julio Hornai iha fatin hanesan informa mos katak PNTL pronto asegura seguransa wainhira lori mate isin Mauk Moruk ba Baucau
