Komemora Loron Mundial Foin Sae, SEJD, Parlamentu Foin Sae  No Bangku De Sangue Organija Doasaun Ran

Komemora Loron Mundial Foin Sae ne’ebe monu iha loron 12 Agustu, SEJD, Parlamentu Foin Sae  No Bangku De Sangue Organija Doasaun Ran iha salaun engkontru SEJD, Lesidere Dili.

“Aktividade bo’ot hotu hotu, ami tau iha Atauru, agora iha nasional, ami tau deit doasaun ran, doasaun ran nia objective maka atu bele liu husi dia mundial ida ne’e, bele fo kontribuisaun sangue ba ita nia Guvernu, ita nia Estadu, atu nune’e liu husi ita nia ospital bele ajuda fali ema sira ne’ebe kbi’it laek kuandu derepenti ema ruma moras, entaun liu husi ran ne’e bele salva ema nia vida”, isplika Florindo Napilaon do Santos Xavier, Chefe Departamentu Movida da Edukasaun Tempu Livre, SEJD.

Florindo hatutan “ami konvida instituisaun barak, hanesan instituisaun militar liu liu ba Maritima, Polisi Militar, BOP ho FDTL iha Tasi Tolu, maibe preokupa ba seguransa, ami konvida nivel universitariu sira, estudante sira mai ona iha ne’e, ohin fungsionariu SEJD mos doasaun ran”.

Iha fatin hanesan Arsenio Jose, Chefe Unidade iha Banku de Sangue hateten katak “aktividade ida ne’e atu selebra loron internasional ba juventude, ne’ebe monu iha dia 12 de Agustu, parte komisaun organijadora liu husi Parlamentu Foin Sae, organija aktividade ida ne’e e koopera ho ekipa husi Bangku de Sangue hodi apoiu aktividade hasai ran husi doador voluntariu sira”.

Arsenio esplika liu tan katak “agora dadauk ami hetan ema nain 18, ra ne’ebe ami hasai ami sei lori ba bangku de sangue, e ami nia tekniku sira sei halo testu ba moras hanesan hepatitis, sifilis no mos HIV, rejultadu diak hotu, ami sei kontinua garantia stok atu nune’e bele atende nesesidade ema moras ne’ebe baisa iha ospital nasional no iha ospital referral sira”.

Kru Radio Liberdade, Natalia Soares Rosa, ne’ebe halao mos doasaun ran senti oruguliu ho saida mak nia halo ona tamba bele tulun ema seluk nia vida.