Seremonia Aniversariu Deklarasaun Insurisaun Forsa Armada

Aileu, Radio Online -Seremonia aniversariu Deklarasaun Insurisaun Armada ba dala 40, selebra iha Aiseremou, munisipiu Aileu, iha loron 17/8/2015.

Komemorasaun ne’e laos deit atu hanoin no fo homenajen ba autor sira maibe liu liu atu hamoris nafatin ba jerasaun foun sira valor ideal no istoria ba sira ne’ebe uluk, halo no fo buat hotu hotu nune’e bele moris livre no independente iha tempu agora

Iha deskursu ba seremonia  ne’e, Doutor Mari Alkatiri haktuir katak, “Bainhira revolusaun dus gravus akontese iha Portugal, Timor- Leste hahu buka dalan atu lao mesak, buka dalan atu afirma ita nia identidade rasik, buka dalan atu proklama ita nia independensia, hahu fiar katak kolonialismu hotu ona, e ita bele organijaan politikamente atu bele hetan independensia e la persija atu fakar ran maibe bainhira ami lubun oan ida hahu prosesu ida ne’e, ami biar fiar atu bele hetan independensia ho dalan ida ke la persija atu fakar ran, ami rasik hanoin ne’e susar teb-tebes, tamba ne’e maka moris movimentu ida ne’e ho moto ida kedas, mate ka moris ukun rasik an”. 

“Komite Central FRETILIN retira husi Dili, mai Mota Ulun, husi ne’eba mai to’o Aiseremou, husi ne’e tenta hanoin fila fali sa dalan mak ami tenki uza para atu defende ita nia direitu, laiha dalan seluk, ema kaer kilat kontra ita, ita tenki kaer kilat defende ita nia an, ne’e mak iha 15 de Agustu 75, komite central FRETILIN, deklarasaun halo husi saudoju Nikolau Lobatu, proklama duni Insurisaun Jeral Armada, hatete saida ba mundu, ami pronto fo an ba mate, povu ida ne’e sei manan nafatin”, afirma Doutor Mari Alkatiri. 

Leitura ba Deklarasaun Insurreisaun Armada ne’ebe proklama iha 15/8/1975, hato’o ka le sai husi Irmao Junior Maubrani no Irman Hakmatek.