Dili, Radio Online_“Prosesu preparasaun orsamentu ba orsamentu jeral du Estadu 2016, semana oin, ita tama ona ba diskusaun iha Komite Revijaun Orsamentu Nivel Politik, nia kalendariu mak sei hahu iha dia 7 loro kraik to’o iha dia 17,” informa Vise Ministru Finansas, Helder Lopes, iha loron 4/9/2015, iha salaun Knowledge Centre, Ministeriu Finansas.
Vise Ministru Finansas ne’e isplika liutan katak, “Komisaun Revijaun Orsamentu Nivel Politik ida ne’e atu halo diskusaun kona ba submisaun proposta orsamentu ne’ebe submete husi linha Ministeiu sira nune’e Ministeriu Finanasas hamutuk ho Gabinete Primeiru Ministru desde semana rua liuba to’o ohin loron prepara dadaun dokumentus hotu para bele lori ba Komisaun Revijaun Orsamentu semana oin hodi deskuti.”
“Governasaun uluk no mos Guvernu ida ne’e, iha komitmentu atu kontinua promove transparansia liu liu iha parte despeza Estadu publiku nian, tamba ne’e maka iha prosesu preparasaun orsamentu jeral du Estadu mos ami kontinua hakarak hato’o informasaun ne’e ba ita nia publiku,” dehan Lopes.
Maske iha diskusaun jornadas Guvernu desidi pakote 1.3 maibe bele mosu lista orsamentu adisional husi Ministeriu ka instituisaun Estadu balun, hanesan Lopes isplika, “Iha diskusaun jornadas orsamentais ne’ebe halao iha fulan Junhu, Guvernu desidi atu ba 1.3, nune’e submisaun orsamentu husi linha Ministeriu sira no instituisaun Estadu sira tuir duni pakote ne’ebe aprova 1.3 maibe atu hato’o mos ba ita bo’ot sira, iha mos Ministeriu balun ou instituisaun Estadu balun ne’ebe hatudu indikasaun balun katak sira iha lista adisional ne’ebe sira hakarak lori ba Komisaun Revijaun Orsamentu hodi deskuti iha ne’eba, tamba saida mak hodi mosu lista adisional, ida ne’e konforme sira mak justifika iha Komisaun Revijaun Orsamentu tamba ida ne’e kompetensia Komisaun Revijaun Orsamentu hodi aprova proposta orsamentu no mos lista adisional ne’ebe linha Ministeriu ka Instituisaun Estadu sira karik iha.”
Lopes mos esklarese kona ba kompetensia ne’ebe Ministeriu Finansas iha relasiona ho pakote orsamentu no lista adisional orsamentu katak, “Submisaun ne’ebe tama 1.3 tamba iha dekretu Guvernu ne’ebe foin dadauk aprova hateten dehan hanesan ne’e, Ministeriu Finansas iha kompetensia atu rejeita submisaun linha Ministeriu ka instituisaun Estadu sekarik submisaun ne’e mak mai la tuir pakote fo, tamba ne’e mak purejemplu fo deit 2 miloens maibe mai ho 3 miloens, proposta ne’e rejeita, haruka fila ba hadia to’o tuir duni pakote ne’ebe fo maka ami bele simu tamba ne’e maka submisaun sira ne’ebe tama tuir duni pakote 1.3 maibe hanesan ohin hau mensiona, iha lista adisional iha indikasaun katak instituisaun balun, iha Ministeriu balun iha lista adisional ne’ebe ke sira iha intensaun lori ba Komisaun Revijaun Orsamentu hodi deskuti iha ne’eba, kuandu ida ne’e lista adisional Ministeriu Finansas laiha kompetensia atu aseita ka la aseita ou aprova ka la aprova, ida ne’e kabe ba kompetensia Komisaun Revijaun Orsamentu.”
Lopes haforsa liutan katak “1.3 ne’e submisaun sira ne’ebe tama maibe se karik aprova lista adisional, ida ne’e bele sae.”
