10 Mill Salari Eis Ministra Finansas Ba Knar Strategic Leadership And Innovation Advisor Iha MF

Dili, Radio Online-“ US $ 10 mill salari eis Minista Finansas ba knar Strategic Leadership And Innovation Advisor iha Ministeriu Finansas,” lia hirak ne’e hato’o husi Vise Ministru Finansas Helder Lopes, iha loron 4/9/2015, iha salaun Knowledge Centre, relasiona ho informasaun balun ne’ebe hatun iha midia diariu ne’ebe koalia kona ba salari eis Mintra ba servisu foun ne’ebe eis Ministra asumi iha Ministeriu Finansas.

Vise Ministru ne’e klarifika katak, “Se hau la sala, loron rua liu ba, liu husi diariu Timor Post no mos diariu Independente, iha berita ne’ebe koalia kona ba salariu ba sra.Emilia nian, nudar responsabel ba instituisaun ne’ebe fo servisu ba sra.eis Ministra, hau hakarak informa ba ita bo’ot sira katak mensajen ne’ebe hato’o husi ita nia Distinta ou Distintu Deputadu ka Deputada liu husi Parlamentu, informasaun ne’e ami hakarak hatete katak salariu ne’ebe agora dadauk ita nia eis Ministra simu husi Ministeriu Finansas ba servisu ne’ebe nia halo maka des mil, des mil ne’e koa ona des porsentu impostu, montante lolos ne’ebe iha dokumentu kontratu iha ne’e ita nia ema sira fo hatene mai ami maka ninia salari lolos, salari net ka salari bersih ne’ebe nia simu maka des mil.”

Lopes isplika mos kona ba knar ne’ebe eis Ministra ne’e halao iha Ministeriu Finansas katak , “nia hahu iha 8 de Junhu 2015 e depois nia kontratu sei hotu iha dia 7 de Junhu 2016, nudar Strategic Leadership and Innovation advisor, atu hatete deit nia toma konta kona ba stratejia lideransa no inovasaun, iha servisu lubuk ida, servisu ne’ebe agora dadauk nia halo mak nia ajuda ita nia diresaun jeral servisu kooperativus hodi hare reforma iha area ida ita bolu performens management reform, ida ne’e hare kona ba oinsa atu hadia rekursu humanu no sistema iha Ministeriu Finansas nia laran atu halo nia prestasaun servisu diak liutan, ida ne’e  mak agora dadaun nia halo, alende ida ne’e nia servisu hamutuk ho  entidades seluk bainhira  persija ninia ajuda.”


Hatan ba perguntas jornalista nian kona ba dadauk eis Ministra hetan prosesu kaju iha Ministeriu Publiku, Vise Ministru ne’e hatan katak, “Prisnsipiu ida praduga tak bersalah ne’e, iha nasaun ne’e ita aplika karik, wainhira kuandu Tribunal akuja ona nia sala ne’e kestaun oin seluk, maibe kuandu sidauk akuja kualker sidadaun ida ita tengki respeita ninia direitu.”

Lopes mos isplika kona ba prosesu rekrutamentu ne’ebe Ministeriu Finansas halao ba pojisaun Strategic Leadership And Innovation Advisor katak, “ami la hatudu ema mai servisu kedas, iha sistema ne’ebe ema atu mai servisu iha ne’e liu husi prosesu rekrutamentu tamba ne’e maske nia eis Ministra nia tengki liu husi prosesu rekrutamentu ne’ebe iha, ami iha file, ami iha dokumentus hotu ne’ebe iha para se karik aban bainrua ema ruma persija it abele hatudu, ninia prosesu rekrutamentu makhanesan tuir mai ne’e, ita persija ema atu servisu iha area ida ne’e ita publika vaga ne’e, wainhira nia interese aplika, nia aplika, ita halo selesaun ba nia dokumentus, e depois tama ba fase intervista, iha panel nebe interview nia, nia liu tamba nia diak liu kompara ho aplikante sira seluk, ne’ebe atu hatete deit, ita rekruta, laos tamba uluk nia Ministra iha ne’e haruka nia mai halo kedas servisu, maibe nia mos liu husi prosesu rekrutamentu.”