Dili, Radio Online_Ministru Negósiu Estranjeiru no Koperasaun, Hernani Coelho iha loron 09 Setembru 2015, sei halao vizita trabalho iha Japaun, informasaun ne’e Radio Liberdade Dili simu via email iha loron 7 fulan Setembru 2015.
Iha vizita trabalho durante loron ida ne’e, Ministru Hernani Coelho sei reprezenta Xefe Estado Timor-Leste, Prezidente Taur Matan Ruak, hodi kondekora Sidadaun Japones hamutuk 13, ho medalha Ordem Timor-Leste, iha loron 09 Setembru 2015, tuku 17:30, oras Japaun nian.
Sidadaun Japones hirak ne’ebé sei hetan kondekorasaun mak sidadaun sira ne’ebé, hahu iha tinan 1980 to 1999, dedika ona sira nian a’an no tempu hodi fó apoio ba Timor-Leste nian luta ba restaurasaun independensia.
Entre Sidadaun Japones sira ne’ebé sei hetan kondekorasaun maka hanesan Eis Senador no Primeiru Ministru ida, Eis Senador no Ministru Justisa ida, Eis Senadora no Ministra Ambiente ida, matebian Bispo ida, no figura sira seluk iha sosiedade Japones nian balun.
Tuir plano, iha vizita trabalho ida ne’e, Ministru Hernani Coelho sei halao mos reuniaun kortezia ho nian homologo, Ministru Negósiu Estranjeiru Japaun, Fumio Kishida, no sei partisipa iha Business Breakfast ho reprezentante empreza japaun nian balun, ne’ebé, organiza husi Embaixada Timor-Leste nian iha Tokyo, hodi koalia konabá dezenvolvimentu ekonomiku Timor-Leste.
Durante vizita iha Tokyo, Japaun, Ministru Hernani Coelho sei akompaña hosi Embaixador Timor-Leste ba Japaun, Isilio Coelho no ofisial protokolo hosi parte Prezidensia Repúblika Timor-Leste.
Ministru Hernani Coelho desloka ba Japaun iha loron 08 Setembru 2015, hafoin akompaña Xefe Estado Timor-Leste, Prezidente Taur Matan Ruak durante nian vizita trabalho loron ha’at iha Xina, hodi partisipa iha seremonia komemorasaun tinan 70, fim hosi funu mundial daruak (Segunda Guerra mundial). Tuir programa, Ministru Hernani Coelho sei fila hikas hosi Japaun iha loron 10 Setembru 2015.
Ministru Hernani Coelho Reprezenta Xefe Estado Timor-Leste Entrega Medalha Ordem Timor-Leste bá Sidadaun Japones 13
Maria Bibel
Hits: 538
