Komunidade Suku Costa Seidauk Asesu Di’ak ba Infrastrutura Báziku: Reprezentante Komunidade

Dili - Radio Liberdade Online - Reprezentatnte populasaun iha aldeia Lakfoan no Oetfo Suco Costa Pante Makasar,  Alberto Neno, hateten mezmu Timor-Leste ukun-an tinan  13 ona, maibé komunidade iha aldeia hirak ne’e, sei hetan problema boot ba nesesidade báziku.

Problema ne’e populasaun hato’o bainhira Bankada FRETILIN Parlamentu Nasional, Deputadu Manuel Gaspar no Joaquim do Santos, halao vizita kontaktu eleitór iha  loron (04/09/2015) iha rejiaun  autonomia  Oecusse-Ambeno.

iha oportundidade ne’e, Deputadu bankada FRETILIN, Deputadu Manuel Gaspar,  hateten problema estrada,  Be’e  mos , klinika no eletrisidade hirak ne’e akontese iha fatin barak, ho nune’e mak nu’udar reprezentante povu sei hato’o problema ne’e ba Governu  atu rezolve.

Reprezetante povu iha uma fukun  Parlamentu Nasionál husu ba militantate sira atu labele fiar polítika foer ne’ebé mak promote ba sira, nune’e dezenvolvimentu bele la’o di’ak no povu bele sai husi kiak no mukit.

“Atu dezenvolvimentu la’o ho di’ak no hasai povu husi kiak no mukit husu ba populasaun sira hotu atu labele fiar politíka foer ne’ebé partidu sira halo no pormete bosok tamba sira  sei la tau matan ba imi, maibe buka hariku-an deit,” dehan Deputado Manuel.

iha fatin hanesan Deputado, Joaquim dos Santos hateten problema barak mak larezolve tamba governante sira dezde AMP no Bloku koligasaun laiha seriadade no responsabilidade, tan-ne’e problema hirak ne’e kontinua mosu, maibé ho ZEEMS bele hatudu dadaun naroman foun dezenolvimentu nian hodi hasai  povu  Oecusse husi kiak no mukit.  

“Hau husu ba imi hotu atu hamutuk neon ida laran ida deit ho FRETILIN iha elisaun 2017 hodi bele ukun, tamba FRETILIN hato ona promesa ba povu dezde tempu okupasaun hodi  liberta nasaun no liberta povu tamba ne’e so partidu FRETILIN mak bele rezolve imi nia problema no kore imi husi kiak no  mukit, tamba FRETILIN mak imi nia Partidu,” Santos haktuir.

Tuir fakta empiris, dezenvolvimentu infrastrutura báziku iha Timor-Leste seidauk to’o iha area rural hotu. Realidade ne’e mosu husi–kedas rai ida-ne’e restaura ninia independensia iha 2002 no hahuu husi primeiru Governu ne’ebé Fretilin ukun.

Governu dadauk ne’e halo esforsu makas hodi harii infrastrutura bázuku, hanesan Estrada, eletrisidade no bee mos, maibé seidauk kovre teritóriu tomak. Kuaze 75% populasaun Timor-Leste mak asesu ona ba eletrisidade.

Tiimor-Leste restaura ninia indepedensia iha 20 Maiu, 2002 hafoin liu-hosi prosesu administrasaun tranzitóriu ne’ebé hala’o husi ONU durante tinan rua.