Xanana “Hau Nia Almamater mak Fretilin ”

Dili,Radio-Online;  Aktual Prezidente partidu CNRT, Kay Rala Xanana Gusmão, iha nia diskursu hateten too ohin loron nia rekoñese partidu Fretilin nudar Almamater polítika ba nian.
“hau hateten lolos katak hau nia almamater polítika mak partidu Fretilin, hau aprende polítika barak husi Fretilin” tenik Xanana, iha komemorasaun  tinan ha’at nolu resin ida (41) transformasaun Partidu Assosiação Democrática de Timorense  (ASDT) ba Frente Revolucionário do Timor Leste Independente (Fretilin),  iha sede Komité sentral Fretilin Dili, Sesta feira 11/11/2015.


Eis membru komite central  hateten, nia sai husi partidu Fretilin tamba  atu haburas demokrasia iha Timor-Leste  tuir prinsípiu partidu Fretilin nian.
Iha fatin hanesan, sekretáriu jeral Partidu Fretilin, Mari Alkatiri, iha nia entrevista hateten,  Fretilin nia obrigasaun  hodi  konvida ema hotu- hotu ne’ebe uluk hamutuk ho Fretilin hodi luta ba ukun rasik an.


Alkateri hatutan, Xanana hanesan membru komite sentral, ne’ebe hamtuk ho Fretilin desde tinan 1975.
Alkateri salienta liu tan, Fretilin la nega istoria, nafatin fo rekoñesementu ba ema ne’ebé mak uluk Fretilin maske agora la’os ona militante Fretilin
“Istória, istória, ita labele nega, ami nafatin fo rekoñesementu ba ema ne’ebé uluk ho Fretilin maske agora laos ona Fretilin ona” dehan Alkatiri.


Iha komemorasaun ne’e partidu Fretilin entrega certifikadu hamutuk 672  ba militantes Fretilin ne’ebé uluk Luta ba ukun rasik an.
Fretilin hahu distribui certifikadu ba luta nai’n sira iha tinan 2004, no ba oin, Fretilin kontinua esforsu maka’as hodi rekolla dadus milintantes sira ne’ebe seidauk hetan sertifikadu rekoñesementu.