Aparicio De Oliveira :Entidades Hotu Tenke  Kolabora Hamutuk Hodi Kombate  Virus HIV/SIDA

Dili, Radio Liberdade Online-Director Ezekutivu, Fundasaun Timor Hari’i (FTH), Apricio de Oliveira, hateten  atu Timor Leste bele livre husi moras HIV/SIDA, ema hotu-hotu tengki iha konsensia serbisu hamutuk hodi kombate moras ne’e.

Direitor ezekutivu hateten, Fundasaun Timor Hari’i hanesan Organizasaun Nao Governamental lokal  ne’ebe durante ne’e serbisu hamutuk ho Ministériu Saude hodi halo teste ba ema ne’ebe mak hetan risku husi moras HIV/SIDA.

“FTH durante ne’e fo espasu ba kliente balun liliu ba sira ne’ebe hetan risku husi  moras HIV/SIDA, hodi halo teste ba sira nia saude, ami mos  serbisu hamutuk ho Ministériu Saude, halo tratamentu ba sira ne’ebe mak afeita ona ho moras ne’ebé hadaet husi relasaun seksual, ” tenik Soares, ba jornalista Radio Liberdade, kinta Feira, 22/10/2015, iha nia kna’ar fatin,  Farol, Dili.

Nia esplika kada loron FTH rejistu kliente minimu ema nain lima mak halo teste ba risku moras HIV/SIDA. 

Nia klarifika liu tan durante ne’e  FTH konsege rejista kuaze ema nain 10  ne’ebe mak afeita ona moras HIV/SIDA.

Entertantu FTH, oras ne’e dadaun, iha ona  filial ha’at, mak hanesan iha Munisipiu Maliana, Suai, Baucau, inklui  rejiaun especial Oe-Cusse tamba fatin hirak ne’e identifika iha risku bo’ot ba moras HIV/SIDA. 

Tuir dadus husi komisaun Nasional Kombate HIV/SIDA  iha Timor Leste kuaze ema atus lima resin ne’ebe hetan ona moras HIV/SIDA.