Komemora Misaun Evanjelizasaun Tinan  500 liuhusi ekspozisaun

Dili, Radio Liberdade Online- Fundasaun Canossa serbisu hamutuk ho Madre Canossiana, loke ekspozisaun publiku  inklui  aktividade teatru istoriku ne’ebe relasiona ho vida religoza nian hodi hanoin hikas fali tinan atus lima liu ba, ezistensia relijaun Khatolika iha Timor-Leste.

Konseleru, Fundasaun Canossa, Erika Trojer, esplika aktividade  ne’e importante  atu ema hotu komprende  sira an rasik nudar sarani katolika.

“Ida ne’e parte ida atu komemora loron evanzelizasaun iha Timor-Leste ba tinan 500, iha aktividade jogu hanesan oinsa buka solusaun ba konflitu, aprende komunikasaun diak inklui mos halo meditasaun, ida atu ajuda ema atu komprende an nudar ema sarani,” tenik  Erika ba Jornalista Radio Liberdade, Sesta Feira 23/10/2015.

Erika akresrenta liu tan, durante ne’e sira konvida grupu kuaze atus ida, hodi partisipa iha aktividade ne’e maibe grupu  balun deit mak partisipa.

Tuir nia aktividade ne’e hanesan buat foun ba Timor oan tan ne’e presiza lao ho  dezafius sira hanesan ne’e.

Iha fatin hanesan, senadu Instituto Professional De Canossa,  Americo da Cruz, esplika, sira senti kontenti hodi hola parte iha espozisaun tamba hetan oportunidade atu promove no  fahe informasaun konaba siensia sira ne’ebe mak durante sira aprende iha sira nia intstuisaun liliu konaba area informatika.

Espozisaun hala’o durante loron tolu hahu loron 22-25/10/2015, iha Lecidere, Canossiana Centru Mangalhães, aktividade ne’e hetan suporta husi Secretario Estado Para Formação Profressional e Emprego (SEPFOPE).

Tuir observasaun Jornalista Radio Liberdade  nota katak iha fatin refere ladun iha partisipasaun masimu husi komunidade sira karik forma jogu ne'e foun ba ema oinsa buka solusaun ba konflitu sira.