Prezidente Taur Matan Ruak Promulga ona OJE 2016

Dili, Radio Liberdade Online -Prezidente Repúblika, Taur Matan Ruak, Quarta  ohin, promulga ona Orsamentu Jerál Estadu ba tinan  2016, ne’ebé mak Parlamentu Nasionál

konfirma.

Tuir artigu 88, númeru 2 hosi Konstituisaun, Prezidente Repúblika tenke promulga diploma ne’ebé mak Parlamentu Nasionál konfirma iha loron ualu nia laran, hahú hosi loron simu diploma refere iha fulan Dezembru.

Desizaun promulgasaun ida ne’e loke dalan atu hahú ezekuta ona orsamentu  refere, maibé razaun hirak ne’ebé mak iha inísiu hamosu veta polítiku ba Orsamentu Jerál Estadu ne’e mantein nafatin, ne’ebé relasionadu ho definisaun prioridade sira kona-ba satisfasaun nesesidade bázika sira populasaun nian.

Prezidente Repúblika fó hanoin ona antes kona-ba nesesidade atu tau atensaun ba setór sira hanesan saúde, edukasaun, agrikultura, aumenta investimentu ba fornesimentu bee moos no ba saneamentu báziku.

Prezidente Repúblika, Taur Matan Ruak, iha komprimisiu atu  kontinua tau matan nafatin ba ezekusaun Orsamentu Jerál Estadu tinan 2016.