Dili, Radio Liberdade Online - Ministériu Defeza Indonesia no Timor-Leste (TL) iha tinan ida ne’e sei asina akordu hodi halo tratamentu ba Veteranus sira iha hospital, Gatot Soebroto Indonesia.
Haktuir Ministru Defeza Timor-Leste, Cirilho Cristovão, ba Jornalista sira hafoin hetan vizita husi nia omologo Nora Ryamizard Ryacudu, Segunda Feira, 1/2/2016., iha Quartel Geral Falentil Forsa Defeza Timor-Leste (F-FDTL), Fatuhada Dili.
“Sira nia Vizita ro’o mai iha ne’e , ita sei asina akordu iha Tinan ida ne’e, liliu Ministériu rua ne’e sei implementa konaba akordu konaba halo tratamentu ba ita nia veteranu iha Hospital Gatot Soebroto Indonesia,” tenik Ministru Defeza Timor-Leste.
Alen ida ne’e nia mos esplika durante ne’e iha akordu ida ho naran INAMOR kopersaun entre militar Indonesia F-FDTL iha area kapitasaun nian no iha Tinan ida ne’e mos sei haruka tan Ofisiais F-FDTL atu ba tuir formasaun iha Indonesia.
Iha fatin hanesan Ministru Defeza Indonesia, Ryamizard Ryacudu, hateten Indonesia prontu atu fo apoiu ba Timor-Leste, iha area Defeza nian hodi hametin liu tan relasaun entre nasaun rua ne’e liliu instituisaun Defeza nian.
“Timor-Leste hanesan nasaun foun, tan ne’e Indonesia kontinua fo apoiu nafatin ba Timor-Leste, hanesan dadaun ne’e ro’o husi husi hospital TNI Indonesia halo tratamentu saúde ba Veteranu sira iha Timor-Leste,” tenik Ministru Defeza Indonesia.
