Xanana Gusmao Xefia Delegasaun Negosiasaun  Frontreira Maritima 

Dili, Radio Liberdade Online - Governu liu husi Konselho Ministru, iha semana ida liu ba, hili ona eis Preimeiru Ministru, Xanana Gusmao, sai Chefe Delegasaun hodi halo negosiasaun fronteira  maritima entre Timor-Leste ho Autralia e Indonesia, informa Porta voz Konselho Ministru  Interinu, Nelio Isaac, atual SECOMS ba Jornalista Radio Liberdade, iha Palacio Governu, 9/2/2016.

“Iha semana kotuk liu ba, Konselho Ministru ou Governu diside eis Premeiru Ministru Kairala Xanana Gusmao sai nudar Chefe Delegasaun ba halo negosiasaun kona ba fronteira maritima ho Australia tanto ho Indonesia,” informa Nelio.

Porta voz Konselho Ministru ne’e haforsa tan katak liu husi inkontru konselho ministru ohin altera dekretu  lei ida konaba konselho da limitasaun  fronteira ninian  no fo mos konpetensia ba chefe delegasaun atu halo nia servisu, “altera tan  dekretu lei ida konaba konselho da limitasaun  fronteira ninian  no fo mos konpetensia ba chefe delegasaun atu halo nia servisu inklui mos strutura sira ne’ebe mak sei fo apoiu chefe delegasaun atu halo ninia servisu iha negosisasaun fronteira maritima ho Australia no mos Indonesia.”

Nelio Isaac  akresenta mos kona ba  kompetensia chefe delegasaun , “konpetensia barak mak defini iha ne’eba, konpetensia difini planu, halo negosiasaun, depois estudu buka estratejia oinsa mak  bele atu fo vantazen ita nia problema e halo estudu konaba buat oi-oin konaba situasan fronteira maritime.”