Dili, Radio Liberdade Online - Prezidenti Republika, Taur Matan Ruak, kinta Feira 11/2/16 fo posse ba Embaixador nain ne’en 6 hodi halo serbisu iha Rai Liur no sai imajem Timor nian ba iha Nasaun seluk.
Iha ceremonia tomada de Posse ne’ebe hala’o iha Salaun Prezidente Nicolau Lobato Xefe Estadu, Taur Matan Ruak, husu ba Embaixador sira atu halo serbisu ho diak no dada investor sira atu mai investe iha Timor-Leste .
“Ita bo’ot sira nia misaun importante tebes, hanesan imajem Timor nian, presiza hametin ita nia relasaun ho sira, informa ba sira konaba ita nia situasaun, dada sira nia interese mai iha ita nia Nasaun, esforsa an hodi dada investor sira mai investe iha ita nian Nasaun ” Tenik Xefe Estadu.
Iha fatin hanesan Embaixador foun ba Cuba, Lorosa’e Horta, iha nia entrevita hateten durante nia mandutu nudar embaixador nia sei tau importansia liu ba iha koperasaun area turismu nia tamba kuba iha esperensia barak iha area Turismu nian.
Embaixador ne’ebe simu tomada de posse mak Francisco Tilman Embaixador Timor-Leste ba iha Bruxelas, João Camara ba Myanmar, Adalgiza Ximenes, ba Korea do Sul, Lorosa’e Horta, ba Cuba, Alberto Carlos, ba Indonesia no Milena Pires ba Reprezentativu permanente Timor-Leste ba Nasoens Unidas .
