Dili, Radio Liberdade Online - Ida husi proposta rua Governu nian ba nomeasaun xefia foun ba FALINTIL-Forsa Defeza Timor-Leste (FFDTL) hetan aseitasaun husi Prezidente Repúblika, informasaun ne’e Radio liberdade asesu liu husi komunikadu imprensa via email iha loron 15/4/2016.
Iha loron 7 fulan-abríl, durante sorumutuk semanál ho Primeiru-Ministru, Rui Maria de Araújo, Prezidente Repúblika, Taur Matan Ruak, husu ona ba Governu aprezenta proposta foun ida ba xefia F-FDTL.
Proposta ida ne’e iha tiha ona konsulta ida ho atuál xefia sira husi F-FDTL, husi Ministru Defeza, no rezultadu husi análize kona-ba situasaun ne’ebé hala’o tiha iha sorumutuk Konsellu Ministru nian, iha loron 12 fulan-abríl.
Iha loron 13 fulan-abríl, Governu haruka proposta rua ba Xefe Estadu no iha loron 14/4/2016, Prezidente Repúblika fó sai katak nia hatán ona proposta ida husi proposta rua ne’e.
Portavós Ezekutivu, Ministru Estadu Agio Pereira, hatete “Governu haksolok tanba órgaun soberanu rua ne’e bele to’o ona iha hanoin ida ne’ebé hanesan kona-ba xefia iha Forsa Defeza iha país ne’e. Dala ida tan, mak ita konsidera katak, tau ona iha prátika diálogu no respeitu mútuu ne’ebé hatudu ita-nia sistema demokrátiku, nu’udar prova ba pás, estabilidade no progresu ne’ebé mak sura labele iha ita-nia nasaun joven ne’e”.
