Timor Oan Nain 12, Lakon Iha Okupasaun Indonesia, Fila Mai TL

Dili, Radio Liberdade Online - Timor oan nain 12, ne’ebe durante ne’e lakon iha tempu Indonesia iha tinan 1975 too 1999 fila hikas mai Timor-Leste hodi hasoru sira nia familia.


Timor oan hirak ne’e fasilita husi Provedoria dos Direitos Humanos e Justiça (PDHJ), Ajar (Asia Justice and Right) Indonesia no Timor-Leste, Cruz Vermelha Innternasional, inlkui Komisi Nasional Hak Asasi Manusia (KomNas HAM) Indonesia. 

Iha loron Tersa feira 17/5/16, Timor oan Nain 12 ne’e hasoru malu ho Prezidenti da Repúblika, Taur Matan Ruak, hodi halo díalogu ho Xefe Estadu konaba sira nia prezensa mai iha Timor-Leste.

Iha entrevista Provedor dos Direitos Humanos e Justiça, Silveiro  Baptista afirma,  durante ne’e sira serbisu hamutuk ho parseiru sira hodi lori fila hikas Timor oan ne’ebe mak husik sira nia familia ho idade ne’ebe kiik  hodi tuir Militar Indonesia ba iha Nasaun Indonesia.

Provedor ne’e mos husu ba família Timor oan sira ne’ebe mak sei lakon sira nia oan iha okupasaun Indonesia atu hato’o informasaun ba iha PDHJ hodi sira bele buka tuir.

“husu ba Timor  ne’ebe mak  karik lakon sira nia oan ou familia iha tempu okupasaun Indonesia, no hatene sira sei iha Indonesia Karik bele  hato’o Informasaun ba PDHJ, asosiasaun  hodi ami bele transmite ba Ajar ho Komnas Indonesia atu bele buka tuir sira,” tenik Provedor.

Iha fatin hanesan reprezentante Ajar, Galuh Wandita, no Konmas HAM Indonesia,  Dianto Bahriadi, sei esforsu nafatin hodi buka tuir  sira ne’ebe husik sira nia Fámilia iha Timor-Leste hodi sira bele koñese sira nia família no sira nia kultura.