Dili, Radio Liberdade Online_CEPAD realiza treinamentu liberdade ba informasaun ba Sosiadade Sivil sira iha salaun Tower, Fatuhada, foin lalais ne'e, liu husi treinamentu ne’e Deonizio da Cruz Sarmento nudar komunikasaun Official iha Ngo CEPAD hateten objectivu husi treinamentu ne’e mak atu treinu ema atu sai treinador ba asuntu Liberdade ba Informasaun.
“Objectivu husi treinamentu ida ne’e mak atu treinu ema sai treinador ba asuntu liberdade ba informasaun tantu iha ne’e atu treinador treinu fali ema iha baze ou iha organizasaun,” isplika Sarmento.
Sarmento afirma liu tan katak durante loron ida tomak partisipantes sira sei aprende material sira mak hanesan saida mak informasaun no saida mak liberdade ba informasaun, “materia ida premeiru mak atu fo kuinesementu konaba saida mak informasaun no saida mak liberdade ba informasaun katak informasaun ne’e bele refere ba dokumentus ,dadus, relatoriu ruma e liberdade ba informasaun ne’e kolia konaba direitu atu asesu ba informasaun ne’ebe iha dader tomak ida ne’e ami hare konaba direitu atu asesu ba informasaun, hare konaba benefisiu husi asesu ba informasaun ne’e mak saida e hare mos informasaun ida atu husu ne’e no informasaun ne’e atu husu ba se no se mak bele fornese informasaun sira ne’e, informasaun sira ne’e mai husi orgaun publiku nebe husi instituisaun estadu deit laos organizasaun privada ne’ebe la kesi iha Lei no ita kolia deit konaba institusaun publiku ne’ebe konstituisaun proteze povu nia direitu atu asesu ba informasaun.”
Iha fatin hanesan partisipante husi Sosiadade Sivil, Ngo Fundasaun Mahein, Moezes Vicente hateten katak nudar sosiadade sivil sira hare ba treinamentu ne’e diak tebtebes tamba material ne’ebe mak sira hetan kolia liu konaba liberdade fo informasaun liu-liu ba orgaun soberania sivil sira.
“Treinamentu ida ne’e tuir sosiadade sivil nia hare kapas la halimar liu-liu liberdade ba fo informasaun liu-liu ita nia entidade orgaun soberanu sira ne’ebe mak hanesan Presidenti da Republika, Parlamentu Nasional, Tribunais sira, Ministeriu sira, inportante liu informasaun sira ne’e bele publika ba iha nia sidadaun sira hotu se lae informasaun sira ita la publika ba ita nia sidadaun hotu-hotu entaun tenke identifika informasaun ne’ebe mak segredu nasaun entaun ne’e lalika publika duni maibe informasaun ne’ebe mak bele publika ba ninia sidadaun rasik etaun orgaun estadu obriga toriu tenke publika ba, liu-liu relatoriu saida no sira nia estudu sira ne’e inportante liu ba ida ne’ebe,” dehan Vicente.
