Dili, Radio Liberdade Online - Luta Hamutuk ejiji ba Parlamentu Nasional atu tetu didiak Proposta Orsamentu Jeral Ratifikativu 2016 ne’ebe fo liu preoridade ba dezemvolvimentu iha seitor infrastrutura antes PN halo aprovasaun.
Seitor prioridade sira mak hanesan Projeitu Tasi Mane, Suai Suplay Base no LNG tamba tuir Luta Hamutuk nia observasaun Projetu Suai Suplay Base nia planu la klaru no dadaun ne’e kompania Hunday ne’ebe kaer projetu ne’e retira ona.
Diretor ONG Luta Hamtuk hato’o ejijensia ne’e liu husi konferensia imprensa, kurta Feira, semana ne’e, iha edifisiu Luta Hamutuk, Farol, Dili.
Iha Loron hanesan mos Parlamentu nasional, inklui Governu halo debate espesializada ba Proposta Orsamentu Ratifikativu ba tinan 2016 liliu atu selu dividas ba iha area infrastrutura nia inklui orsamentu projetu bo’ot sira.
Hafoin Vise Ministru Finansas Helder Lopes, afirma importante atu Parlamentu Nasional aprova lalais Orsamentu Ratifikavu tamba ritmu implementasaun projeitu Infrastrutura lao diak maibe orsamentu la to’o atu selu to’o iha fulan Dezembru.
“Ita husu para Parlamentu Nasional aprova Orsamentu Ratifikativu ida ne’e, Projetu balun ne’ebe mak implementa ne’ebe ita seidauk selu tamba ita nia orsamentu ne’ebe ita preve iha fundu infranstrutura la fufisiente atu selu to’o fulan Dezembru ho nia justifikasaun katak ritmu implementasaun ba Projeitu Infrastrura lao maka’as,” dehan Helder Lopes
Governante ne’e afirma liu tan Governu presiza aumenta tan orsamentu miloens atus ida resin ba Projeitu Infrastrutura no ba projeitu bo’ot sira hamutuk milloens besik atus rua Dollar Amerikanu husi Orsamentu Ratifikativu, “Orsamentu Ratifikativu ne’ebe uza ba projetu bo’ot hanesan Portu Tibar, Dili Drainage no Suai Supply Base (SSB) hamutuk milloens 197.7 Dollar Amerikanu ou kuaze 50.6 % husi Orsamnetu Ratifikativu no seluk tan selu ba dividas.”
